Ўзбекистон Ёзувчилар уюшмасида «Ўзбекистон – бағрикенг диёр!» мавзуида маънавий-маърифий тадбир ўтди. Қардош халқлар орасидаги адабий алоқаларни янада мустаҳкамлаш, миллатлараро тотувлик ва маданий алоқаларни кенгайтиришга бағишланган ушбу анжуман доирасида «Адабий дўстлик – абадий дўстлик» мавзуида фотокўргазма ташкил этилди. Шунингдек, турли тилларда нашр этилган китоблар намойиш қилиниб, янги адабий нашрлар китобхонлар эътиборига ҳавола этилди.

Анжуман иштирокчиларини Ўзбекистон Ёзувчилар уюшмаси раиси Сирожиддин Саййид ҳамда Ўзбекистон Республикаси Ҳукуматининг Миллатлараро муносабатлар ва хориждаги ватандошлар масалалари бўйича қўмитаси раиси Қаҳрамон Сариев қутладилар. Ўзбекистон Ёзувчилар уюшмаси фахрий аъзолигига қабул қилинган ижодкорларга тантанали равишда гувоҳномалар топширилди. Дарҳақиқат, бундай шарафга Сайрам туманида яшаб, ижод қилаётган таниқли ижодкор Победа Абдазимованинг ҳам ноил бўлиши ҳамюртлари учун фахр, ғурур. 

Тадбирда қардош тилларда чоп этилган китоблар тақдимоти ўтди. Унда Асадуллоҳ Исмоилзоданинг “Хаёл варраги”, Галина Долгаянинг “Всё, что судьбой предрешено”, қозоқ шоири Қасимхан Бегмановнинг “Улуғ дала сабоси” ҳамда таниқли адиб Мереке Қулкеновнинг “Шодлик” китоблари кенг жамоатчиликка таништирилди.

Анжуманда ҚР “Дўстлик” ҳамжамияти қошидаги “Ижодкор” бирлашмаси раиси Зокиржон Мўминжонов, Ўзбекистон Ёзувчилар уюшмасининг Тожик адабиёти кенгаши раиси Хисрав Саъдулло, Рус адабиёти кенгаши раиси ўринбосари Галина Долгая сўзга чиқиб, халқлар ўртасидаги адабий ҳамкорликни янада ривожлантириш, таржима санъати ва маданий мулоқотнинг аҳамияти ҳақида фикр-мулоҳазаларини билдирдилар.

Тадбир ўзбек, қозоқ, тожик ва рус тилларидаги мушоира билан давом этди. 

Анжуман миллатлараро дўстлик ришталарини янада мустаҳкамлаб, адабиёт ва маданият орқали эзгу ғояларни тарғиб қилиши билан аҳамиятлидир.