Туркистон вилоятида ижтимоий аҳамиятга эга озиқ-овқат маҳсулотлари нархларини барқарорлаштириш ва аҳолини маҳаллий маҳсулотлар билан таъминлашга бағишланган масала вилоят ҳокими девони йиғилишида кўриб чиқилиб, масъул бошқармалар раҳбарларининг ҳисоботлари тингланди. Вилоят ҳокими Нуралхан Кўшеров озиқ-овқат маҳсулотлари нархларининг барқарорлигини, аҳолини сифатли ва ҳамёнбоп маҳсулот-лар билан таъминлаш тадбирларини кучайтиришни топширди.

 – Ижтимоий аҳамиятга молик озиқ-овқат маҳсулотларига мунтазам мониторинг юритиш керак. Нархларнинг асоссиз ошишига йўл қўйилмаслик лозим. Ижтимоий дўконлардаги маҳсулотлар сифатини ҳам назоратга олинглар, жадаллаштиринглар, – деди Нуралхан Кўшеров. 

Вилоятда ижтимоий аҳамиятга молик озиқ-овқат маҳсулотларининг 27 тури ишлаб чиқарилмоқда. Уларнинг 22 тури бўйича ҳудуднинг ички эҳтиёжи тўлиқ таъминланмоқда. Жумладан, помидор билан таъминлаш даражаси эҳтиёждан 10 баравар, биринчи навли буғдой уни 9,1 баравар, карам 6,4 баравар, бодринг 5 баравар, сут 4,2 баравар, пиёз 3,3 баравар юқори. 

Йил бошидан буён барқарорлаштириш жамғармасидан 20 минг тонна озиқ-овқат маҳсулотлари харид қилинди. 

Ижтимоий аҳамиятга эга маҳсулотларнинг аксарияти республикадаги ўртача баҳодан паст даражада сотилмоқда. Ижтимоий дўконлардаги асосий озиқ-овқат маҳсулотлари бозордаги нархларга нисбатан ўртача 20-30 фоиз арзон. Айни пайтда Туркистон, Кентов ва Ариc шаҳарларида 42та ижтимоий дўкон фаолият юритмоқда. 

Аҳолини ҳамёнбоп озиқ- овқат маҳсулотлари билан таъминлашда қишлоқ хўжалиги ярмаркаларининг аҳа-мияти залворли. Йил бошидан буён Туркистон шаҳрида 256та ярмарка ўтказилиб, 12,8 минг тонна маҳсулот бозор нарх ларидан 20-30 фоиз арзон сотилди. Шунингдек, озиқ-овқат маҳсулотлари нархларини барқарорлаштириш мақсадида 70та йирик супермаркет ва 10та товар ишлаб чиқарувчи билан меморандум имзоланди. 

Минтақада ички бозорни маҳаллий маҳсулотлар билан таъминлаш ҳажмини оширишга қаратилган янги лойиҳалар амалга оширилмоқда. Тулкибош туманида йирик паррандачилик фабрикаси босқичма-босқич ишга туширилиб, йилига 48 минг тонна гўшт етиштириш имконини беради. Лойиҳа тўлиқ ишга тушса, 1200дан зиёд иш ўрни яратилиб, вилоятнинг парранда гўштига бўлган ички эҳтиёжини тўлиқ таъминлаш имкони пайдо бўлади. 

Байдибек ва Ўрдабоши туманларида умумий қуввати 30 миллион дона тухум етиштиришга мўлжалланган иккита паррандачилик фабрикасини ишга тушириш режалаштирилган.