Қозоғистон стол тенниси мактабининг иқтидорли спортчиси, Сайрам диёрининг фарзанди – Сарвиноз Мирқодирова халқаро мусобақаларда мамлакат шарафини муносиб ҳимоя қилмоқда.

У 2005 йилда Сайрам қишлоғида туғилган. Беш ёшидан қишлоқдаги 12-сонли спорт мактабида стол тенниси билан шуғуллана бошлаган Сарвинознинг спортдаги илк устози Мирёқуб Мираслонов спортчининг техникаси ва тактикасига, шунингдек, жисмоний ҳамда руҳий тайёргарлигига алоҳида эътибор қаратди.

Машаққатли меҳнат, тинимсиз машғулотлар ўз самарасини берди. 2016 йили Сарвиноз тенгдошлари орасида Қозоғистоннинг мутлақ чемпиони унвонини қўлга киритди ва 13 ёшида спорт устаси меъёрини бажарди. 

Спортчи сўнгги йилларда ўтган мамлакат чемпионатларида совринли ўринларни эгаллади. Жумладан, 2018-2019 йилларда ўсмирлар орасида ўтган республика мусобақаларида чемпионлик унвонини қўлга киритди.

(Давоми. Боши 1-бетда). 

Сарвинознинг халқаро майдондаги илк йирик муваффақиятларидан бири 2019 йили Сербияда ўтган ITTF World Junior Circuit мусобақасида қўлга киритилган ғалабадир. У яккалик баҳсларида биринчи ўринни эгаллади. Бу натижа ёш спортчининг халқаро миқёсдаги салоҳиятини намоён этди.

У 2022 йили Қоҳира шаҳрида ўтган WTT Youth Contender, 2024 йили Сулаймония шаҳрида ўтган WTT Youth Contender, шунингдек, Батуми шаҳрида ўтган мусобақаларда чемпионликка эришди.

2025 йили Сарвиноз Қозоғистон чемпионатида жамоавий баҳсларда олтин, яккаликда бронза медаль олди ҳамда VI Ёшлар спорт ўйинларида яккалик разрядида чемпион бўлди.

Италияда ўтган WTT Feeder Parma халқаро турнирида аралаш жуфтлик баҳсларда бронза медалини қўлга киритди.

Жорий йилда ҳам Сарвиноз Мирқодированинг спорт фаолиятида муҳим воқеалар кўп бўлди. Қозоғистон чемпионатида у жамоавий баҳсларда кумуш, яккалик, жуфтлик ва аралаш жуфтлик разрядларининг ҳар бирида бронза медалини қўлга киритди. Шу тариқа у мамлакатнинг энг тажрибали ва барқарор натижа кўрсатаётган стол теннисчиси эканини намоён этди.

Сарвиноз Мирқодирова жаҳон ва Осиё чемпионатларида ҳам Қозоғистон миллий терма жамоаси сафида иштирок этиб келмоқда. Жорий йили у жаҳон чемпионатида Қозоғистон аёллар терма жамоаси таркибида иштирок этди. 

Қувончлиси, 19 сентябрь куни Япониянинг Айчи ва Нагоя шаҳарларида бошланаётган XX ёзги Осиё ўйинларининг очилиш маросимида Сарвинозга дзюдо бўйича Олимпия чемпиони Елдос Сметов билан бирга Қозоғистон терма жамоасининг байроқдори бўлиш шарафи насиб этди. 

Спортчини ушбу шараф билан қутлаб, янги марраларни забт этишига тилакдошлик билдирамиз!