Алмати шаҳрида Бош вазир ўринбосари – Миллий иқтисодиёт вазири Серик Жуманғарин иштирокида Марказий Осиёда иқтисодий ҳамкорлик бўйича иккинчи Тянь-Шань форуми бўлиб ўтмоқда.

   Форум доирасида Туркистон вилояти ҳокимлиги ва «Шинжон Лихуа» инвестиция холдинги ўртасида ҳудудда пахта кластерининг иккинчи босқичини амалга ошириш бўйича меморандум имзоланди. Ҳужжатни Туркистон вилояти номидан вилоят ҳокими Нуралхан Кўшеров, инвестор томонидан эса «Шинжон Лихуа» инвестиция холдинги директори Сюй Цзе имзолади.

   Меморандум «Марказий Осиё – Хитой» иккинчи саммити доирасида қишлоқ хўжалиги соҳасида эришилган келишувларни амалга ошириш, шунингдек, Қозоғистон ва Хитой ўртасидаги аграр ҳамкорликни янада ривожлантиришга қаратилган. Томонлар ҳамкорликни тенглик, ихтиёрийлик, ўзаро манфаатдорлик, узоқ муддатли барқарорлик ва экологик мувозанат тамойиллари асосида олиб боришга келишиб олдилар.

   Таъкидлаш жоизки, пахта кластери лойиҳасининг биринчи босқичида томонлар самарали ҳамкорликни йўлга қўйди. 2026 йил июль ойининг охирида инвестор биринчи босқич қурилишини тўлиқ якунлади. Натижада Туркистон вилоятида пахта етиштиришга ихтисослашган замонавий база ташкил этилди.

   Шунингдек, пахтани қайта ишлаш, поливинилхлорид қувурлар ишлаб чиқариш, сув тежовчи ускуналар тайёрлаш ва чигитни қайта ишлаш йўналишларини қамраб олган тўртта ишлаб чиқариш ҳамда ёрдамчи объектни қуриш ва фойдаланишга топшириш режалаштирилган.

   Пахта кластерининг иккинчи босқичи доирасида инвестор ҳудудга киритиладиган инвестициялар ҳажмини ошириш ва пахта етиштиришдан тортиб, уни тайёр маҳсулотга айлантиришгача бўлган тўлиқ ишлаб чиқариш занжирини шакллантиришни кўзда тутмоқда. Лойиҳа инвесторнинг ўз маблағлари ҳисобидан молиялаштирилади.

   Иккинчи босқичда ҳудудда пахта етиштириш бўйича замонавий база ташкил этилади. Лойиҳа доирасида ақлли деҳқончилик, томчилатиб суғориш, сув тежовчи технологиялар ҳамда экологик тоза ишлаб чиқариш усуллари кенг жорий этилади. Бу эса сифатли пахта етиштириш ҳажмини ошириш, соҳада технологик ва экологик стандартларни такомиллаштириш имконини беради.

   Бундан ташқари, пахтани чуқур қайта ишлаш йўналишларини ривожлантириш ҳам кўзда тутилган. Жумладан, юқори сифатли ва экологик тоза матолар тўқиш, уй-рўзғор учун тўқимачилик маҳсулотлари ишлаб чиқариш, бўяш ва пардозлаш, шунингдек, тайёр кийим-кечак ишлаб чиқариш корхоналарини ишга тушириш режалаштирилмоқда.

   Шу тариқа, лойиҳанинг иккинчи босқичи пахта етиштиришдан бошлаб, уни ипга айлантириш, мато тўқиш, бўяш ва пардозлаш ҳамда тайёр кийим-кечак ишлаб чиқаришгача бўлган барча жараёнларни қамраб олувчи тўлиқ ишлаб чиқариш занжирини шакллантиришга қаратилган.

   Инвестиция лойиҳасининг амалга оширилиши ҳудуднинг саноат салоҳиятини ошириш, пахтачилик соҳасини диверсификация қилиш, чуқур қайта ишлаш улушини кўпайтириш ва ресурслардан самарали фойдаланишга асосланган замонавий ишлаб чиқаришни ривожлантиришга хизмат қилади. Шу билан бирга, Қозоғистон ва Хитой ўртасидаги трансчегаравий аграр-саноат ҳамкорлигини кенгайтиришга ҳам ҳисса қўшади.

   Инвестор иккинчи босқич бўйича лойиҳаолди тайёргарлик ишлари ва зарур рухсат ҳужжатларини расмийлаштириб, қурилиш ишларини 2027 йилда бошлашни режалаштирмоқда. Қурилиш ишлари икки йил давом этиши кўзда тутилган.

Томонлар лойиҳани белгиланган муддатларда якунлаш, ишлаб чиқариш объектларини фойдаланишга топшириш ҳамда унинг иқтисодий самарадорлигини таъминлаш ниятида.