Туркистон – бутун туркий оламнинг маънавий-маданий пойтахтига айланди

2018 йилда ҚР Тўнғич Президенти, Элбоши Нурсултан Назарбаев Туркистон вилоятини ташкил этиш тўғрисидаги Фармонни имзолади. Туркистон шаҳри вилоят маркази мақомига эга бўлиб, тараққиётнинг янги босқичига кўчди.
Ўтган қисқа давр мобайнида минтақада улуғвор ишлар амалга оширилди. Элбоши топшириғига мувофиқ, вилоятлар, учта мегаполис ва мамлакатдаги йирик компаниялар Туркистонда аҳолига зарур иморатлар қуришга киришиб кетди. Президент сифатидаги хизмат сафарини Туркистондан бошлаган Давлат раҳбари Қасим-Жўмарт Кемелули Тўқаев ҳам Туркистонни бир муддатга ҳам унутмаяпти.
Ҳукуматининг қўллови билан муқаддас шаҳарни тараққий эттиришга туртки берадиган 5та тарихий қарор қабулланди. Ана шундай ғамхўрлик ва тарихга эҳтиром туфайли минтақамиз кундан-кунга гуллаб-яшнамоқда.
Давлат хазинасидан ажратилган ҳар бир тенге Туркистонни яшнатишга, вилоятнинг иқтисодиёти ва салоҳиятини юксалтиришга йўналтирилмоқда. Туркистон шаҳрини жаҳон даражасидаги шаҳарга айлантириш мақсадида пандемия даврида ҳам бунёдкорлик ишлари бир муддат ҳам тўхтамаяпти.
Туркий оламга машҳур аллома, дин ва жамоат арбоби Хожа Аҳмад Яссавий ҳамда қозоқ хонлари ва бийлари, қаҳрамонлари ва буюк шахслари мангу макон топган Туркистоннинг ўзига хос қувват манбаи ва одамга ғайрат-шижоат бағишлайдиган хосияти бор. Шунинг учун ҳам бу шаҳарда яшаш, меҳнат қилишни туркистонликлар бахт деб билади.
Жаҳоннинг буюк мерослари қаторига киритилган Хожа Аҳмад Яссавий мақбарасини ҳамда бошқа тарихий ёдгорликларни кўз қорачиғидай асраб, келгуси авлодга етказишни муқаддас бурч деб билган туркистонликлар масъулияти бугундан эътиборан янада ошди.
Туркистон шаҳрида ҳозир кенг кўламдаги қурилиш авжида.
Шаҳарда халқаро талабларга жавоб берадиган уй-жойлар, маъмурий-тадбиркорлик маркази, маданият, спорт, тиббиёт ва маънавият соҳаларига тегишли иншоотлар қад ростламоқда.
Жорий йилнинг ўзида бир қанча бинолар фойдаланишга топширилади. Буларнинг барчаси – ёрқин келажак сари ташланган шахдам одимлардир.