Қозоғистон Республикаси Ҳукуматининг кенгайтирилган йиғилишида Президент Қ. Тўқаев Ҳукуматнинг ҳозирги босқичдаги фаолиятига қониқарли баҳо бериб, мамлакатимизда юритилаётган ислоҳотлардан кутиладиган энг муҳим натижа – аҳоли фаровонлигини юксалтириш, уларнинг даромадларини ошириш, дея таъкидлади. 

Иқтисодий ислоҳотлар кутилганидек яхши самара бермаяпти. Дарҳақиқат, биринчи ярим йилликда иқтисодиётда 3,4 фоизга ўсим бўлишига қарамай, инфляция 14,3 фоизга етган. Нарх-навонинг ўсиши, айниқса, аҳолининг ижтимоий муҳофазага муҳтож қатламига кучли таъсир кўрсатди. Президентнинг айтишича, Ҳукумат қимматчиликнинг сабаби билан эмас, оқибатлари билан курашмоқда, яъни бозор иқтисодига мос янги муносабатлар йўқ. Шунингдек, маҳсулотларни экспорт қилиш борасида, барқарорлаштириш жамғармаларининг фаолиятида ҳам камчиликлар мавжуд.  Ишсизлик – долзарб масала. Айниқса, ёшларни доимий иш билан таъминлаш эътиборга муҳтож. Шу мақсадда Ҳукуматга меҳнат бозорини ривожлантириш режасини ишлаб чиқиш вазифаси топширилди.

Президент, шунингдек, нефть маҳсулотларини қайта тайёрлаш, аҳолини табиий ва суюлтирилган газ билан таъминлаш, йўл қурилиши соҳасидаги масалаларга ҳам алоҳида тўхталди. 

Янги Қозоғистонни барпо этиш борасидаги Президент ташаббусларини ҳаётга жорий этиш Ҳукуматнинг, маҳаллий ижро органларининг, қолаверса, мамлакатимиз ҳар бир фуқароси зиммасидаги масъулиятли вазифадир.