Шимкент шаҳрининг Қоратепа мавзесидаги 124-сонли мактабда “Адабиёт – қалб кўзгуси” мавзуида маданий-маърифий тадбир ўтди. Кечани ўтказишдан мақсад – ёш авлодни она ватанга меҳр-муҳаббат руҳида тарбиялаш, адабиётга қизиқишини ошириш, ўқувчиларни миллий қадриятларни кўз қорачиғидек асрашга ўргатиш эди. 

Тадбир аввалида таклиф этилган маҳаллий ижодкорлар – Ҳ. Қўчқоров, З. Мўминжонов, З. Карим, хонанда Р. Талашбоев мактабда муқаддам ташкил этилган Абубакир Хонхўжаев номидаги ўзбек тили ва адабиёти хонаси билан танишдилар.

Сўнг бошловчилар Сарвиноз Муҳаммаджонова ва Ҳасан Шомуҳсинов саҳнага  таниқли сўз устаси А. Хонхўжаевни таклиф этишди. У Амир Темур монологини ижро этиб, олқишга сазовор бўлди. Ўқувчилардан Умиджон Йўлдошев буюк шоир, ғазал мулкининг султони Алишер Навоий, Азимжон Эгамбердиев эса шоҳ ва саркарда Бобур қиёфаларида саҳнага чиқишди. Тадбир иштирокчилари, айниқса, мумтоз қўшиқларни маҳорат билан ижро этган Ўткиржон Бодомбоевни узоқ олқишлашди.

Меҳмонлар ҳам ижод намуналари билан барчани баҳраманд этишди. Енбекши туман ўзбек этномаданият бирлашмаси раиси Баҳодир Мирзаҳмедов учрашувнинг юксак савияда ташкил этилганини таъкидлаб, мактаб директори Баян Есимовага, шунингдек, тадбир ташкилотчилари, олий тоифали ўқитувчилар Шаҳло Ҳасанова ҳамда Зулхумор Ўрмоноваларга миннатдорчилик билдирди ҳамда уларга Шимкент шаҳар ўзбек этномаданият бирлашмасининг ташаккурномаларини топширди.