Таниқли шоира, “Барыс”, “Парасат” орденлари соҳибаси, Туркистон вилояти ва Шимкент шаҳрининг фахрий фуқароси, кўплаб адабий мукофотлар совриндори, Қозоғистонда хизмат кўрсатган арбоб Ханбиби Есенқарақизининг 75 ёшга тўлиши муносабати билан Шимкент шаҳридаги “Түркістан” саройида “Хон қизидай Ханбиби” адабий тадбири ўтди.

У нафақат шоира ва ёзувчи, балки жамоат арбоби сифатида қозоқ адабиёти ва маданияти равнақига салмоқли ҳисса қўшган йирик шахсдир. Ханбиби опанинг асарлари теран фалсафий фикрлари, миллий қадриятларни улуғлаши, бадиий тили билан ажралади. У шеърият, наср, публицистика жанрларида ижод қилиб, қозоқ халқи маънавий меросини тиклашга салмоқли ҳисса қўшди. Унинг асарларида Ватанга муҳаббат, одоб-ахлоқ, она юрт мавзулари қамралган. 

Ханбиби Есенқараева, шунингдек, ёш авлод тарбияси, миллий маданиятни асраб-авайлаш масалаларига ҳам алоҳида эътибор қаратмоқда. У қозоқ адабиётига улкан ҳисса қўшган шоира ва ёзувчи, бир қанча шеърий тўпламлар ва насрий асарлар муаллифи. Унинг «Сир сандиқ», «Бир оғиз сўз», «Гул асри», «Оққуш ҳисси», “Муҳаббат – мангу эртак” каби ўнлаб шеърий китобларида миллий қадриятлар, чуқур фалсафий фикрлар ва лирик туйғулар тараннум этилган. Шоира асосан назмда эътироф этилган бўлса-да, унинг ижоди кенг қамровли. Сўнгги йилларда у очерк ва публицистика жанрларида ҳам баракали ижод қилмоқда. 

Юбилей тадбирлари “Ханбиби чўққиси” мушоираси билан бошланиб, “Сендаги мени ўчирма” номли театрлаштирилган томошаси, “Кўклам билан хайрлашмаган ёз” илмий-амалий анжумани, шунингдек, шоиранинг китоблар кўргазмаси билан давом этди. “Түркістан” саройида ўтган “Хон қизидай Ханбиби” якуний тадбирини Қозоғистон Ёзувчилар уюшмаси котиби Бауиржан Жақип олиб борди. Унда Шимкент шаҳар ҳокими Ғ. Сиздиқбеков иштирок этиб, юбилярни самимий қутлади ҳамда эзгу тилакларини етказди. 

Тадбирда, шунингдек, шаҳар маслаҳати раиси Б. Наримбетов, академик Ў. Сабден, Қозоғистон Давлат мукофоти совриндори, шоир Иран Ғайип, таниқли хонанда Т. Бурмистровалар сўз олиб, Ханбиби Есенқарақизининг нафақат қозоқ, балки туркий олам адабиёти ривожига салмоқли ҳисса қўшганини таъкидладилар. Жумладан, у таниқли ўзбек адиби Носир Фозиловнинг “Еске алсаң көніл жадырар” китобини қозоқ тилига ўгириб, нашр эттирди. 

Х. Есенқарақизи Қозоғистондаги ўзбек адабий муҳити ривожига ҳам баракали ҳисса қўшиб келмоқда. Ўзбек ижодкорлари орасида унинг шогирдлари кўп. Жумладан, унга носир сифатида машҳурлик келтирган “Жибек” қиссаси шоира Соатой Камолова таржимасида ўзбек тилига ўгирилди. 

Дарҳақиқат, шоира қозоқ ва ўзбек адабий алоқаларини мустаҳкамлашдаги фидокорона хизматлари учун “Ижодкор” адабий бирлашмасининг Носир Фозилов номидаги Халқаро адабий мукофоти билан тақдирланди. 

Тадбирда Х. Есенқарақизи шеърига ёзилган, халқнинг маънавий хазинасига айланган “Нурикамал”, “Алтинай” ва бошқа кўплаб қўшиқлар ижро этилди. Шунингдек, у ўзининг сара шеърларидан ўқиб берди. Шоиранинг она-Ватанга муҳаббати, маънавий меросга эътибори, табиат гўзаллиги ҳамда инсон қалби олами ҳаққоний тасвирланган асарлари билан қозоқ адабиётидан муносиб ўрин олган.