Пойтахтимизда VIII чақириқ ҚР Парламентининг биринчи сессияси ўтди. Унда Давлат раҳбари Қасим-Жўмарт Тўқаев Ҳукумат ва Парламентга сайёҳликни ривожлантиришга доир қатор топшириқлар берди.

– Ҳукумат ва Парламент сайёҳликни ривожлантириш масаласига алоҳида эътибор қаратиши керак. Мамлакатимизда сайёҳликни ривожлантириш имкониятлари зўр, бетакрор ва сўлим жойларимиз жуда кўп. Бироқ, шу ерларга бориб, дам олишнинг имконияти деярли йўқ. Соҳага тубдан янгича ёндашиш зарур. Аввало, инфратузилмани мажмуавий равишда ҳал этиб, хизмат кўрсатиш соҳасини яхшилаш керак, – деди Қасим-Жўмарт Кемелули. 

Бундан ташқари, Президент тадбиркорлар сайёҳликнинг истиқболи ёрқинлигини тасаввур қилишлари зарурлигини таъкидлади. Мамлакатимизда чет элдан келадиган саёҳатчилар иштиёқ билан томоша қиладиган жойлар жуда кўп. Шундай бўлишига қарамай, ушбу соҳа биз кутгандек юксамаётгани рост.

Республикамизда хушманзара, тарихи бой кўҳна қадамжоларни сайёҳлик масканларига айлантиришга нима тўсқинлик қилмоқда? Таркиби янгиланган Парламент ушбу масалани ҳал этишга киришади. Қадамжоларга олиб борадиган йўлларнинг носозлиги, у ерларда меҳмонларга кўрсатиладиган хизматларнинг сифатсизлиги ҳеч кимга сир эмас. Бу масалалар ҳам ижобий ҳал этилишига умид қиламиз.