Туркистон вилояти ташкил топганининг 5 йиллигига бағишлаб “Қишлоқ кутубхоналарига 20 мингта китоб” акцияси доирасида ташкил этилган “Беш йилликка – беш адабий саёҳат” тадбири уюштирилди. 

Вилоят ҳокимлигининг шафелигида “Фараб” илмий-оммабоп кутубхонаси томонидан ташкил этилган маънавий-маданий тадбир апрель ойида бошланган эди. 

Брифингда Туркистон вилояти маданият ва сайёҳлик бошқармаси раҳбари ўринбосари вазифасини бажарувчи Муқағали Кенжетайули акциянинг муҳимлигини таъкидлади.

– Адабий сафар доирасида Туркистон вилояти маънавияти, адабиёти ва маданияти соҳасидаги муҳим янгиликлар ва тарихини бошқа вилоят аҳолисига таништиришга алоҳида эътибор қаратилди. Дастлабки саёҳатимиз Жамбил вилояти Ш. Уалиханов номидаги вилоят илмий-оммабоп кутубхонасидан бошланди. Сўнгра Алмати, Астана, Қизилўрда ва Шимкент шаҳарларида юқори даражадаги ижодкорларнинг учрашувлари билан давом этди. Туркистон вилоятидан сафарга махсус шоир, ёзувчи, журналист ва кутубхоначилардан иборат делегация аъзолари чиқишди. Ҳозиргача беш минтақада сафар уюштирилган бўлса,  келгусида бошқа вилоятларда ҳам давом эттириш режалаштирилган, – деди Муқағали Кенжетайули. 

Вилоят “Фараб” илмий-оммабоп кутубхонаси директори Жанат Шардарбекованинг сўзларига кўра, “Беш йилликка – бешта адабий саёҳат” лойиҳаси доирасида 19 мингта, “Қишлоқ кутубхоналарига 20 минг китоб” ва “Китоб Travel – 2023” акциялари доирасида 26 мингта китоб тўпланган.

– Йил бошида вилоят ҳокимининг ўринбосари Бейсен Даулетули қишлоқ аҳолисига 20 мингта китоб совға қилиш ташаббуси билан чиқди. Адабий саёҳат давомида ёш авлод келажагини ўйлаган фуқаролар биз билан учрашиб, ўзлари ўқиган китобларни бошқалар ҳам ўқиши учун топширди. Лойиҳа доирасида Жамбил вилояти – 1000та, Алматидаги ҚР Миллий кутубхонаси – 7000та, Астанадаги ҚР Миллий академик кутубхонаси – 4000та, Қизилўрда вилоят кутубхонаси – 4000та, Ал-Форобий номидаги Шимкент шаҳар илмий-оммабоп кутубхонаси – 2000та китоб совға қилди. Алматидаги “Илм маркази” илмий-тадқиқот институти 4000та китоб совға қилди, – деди Жанат Садибекқизи.

Бундан ташқари, “Китоб Travel – 2023” акцияси доирасида вилоят ўқувчилари ва ёзувчиларидан 4000та китоб тўпланди. Режага кўра, барча китоблар вилоятнинг 17 туман ва шаҳарларига ўқиш учун ажратилади.

Брифингда Қозоғистон Ёзувчилар уюшмасининг Туркистон вилоят бўлими раиси, шоир Айдар Сейдазим адабий ташрифни мамлакатнинг ғарбий ҳудудларида давом эттириш таклиф қилинганини маълум қилди.