Туркистон шаҳрида тарихий ва маданий ёдгорликларни муҳофаза қилиш бўйича вилоят комиссиясининг навбатдаги йиғилиши ўтди. Унда соҳага оид долзарб масалалар муҳокама қилинди, туман ва шаҳарлардан йўлланган таклифлар кўриб чиқилди. Йиғилишда вилоят ҳокими муовини Б. Тажибаев ёдгорликларни ўрнатишда қонун талабларига қатъий риоя қилиш зарурлигини таъкидлади.

 – Тарихий аҳамиятга молик ёдгорликларни муҳофаза қилиш жуда муҳим. Бу йўналишда масъул бошқарма ва муассаса томонидан тегишли ишлар давом эттирилиши керак. Туман, шаҳарларда ер участкаларини фойдаланишга топширишдан аввал тарихий ва археологик ёдгорликлар бор-йўқлигини аниқлаб, мутахассисларнинг хулосасини олиш керак. Яна бир масала – янги ёдгорликларни ўрнатишда қонун талаблари ва махсус қоидаларга риоя қилинсин. Ўзбошимчаликка йўл қўйилмайди. Ёдгорликнинг тарихий аҳамияти инобатга олиниши керак. Эл-юртга таниқли одамлар, мамлакатнинг фахрий шахсларигагина ҳайкал ўрнатишга рухсат берилади. Иккинчидан, ушбу комиссия таркибини янгилаб, унга тажрибали меъморлар ва ҳайкалтарошларни ҳам киритиш зарур, – деди ҳоким муовини.

Комиссия йиғилишида вилоят маданият ва туризм бошқармаси раҳбари вазифасини бажарувчи Адил Қўнисбеков «Туркистон вилоятидаги монументал санъат қурилишлари» мавзуида маъруза қилди. Тарихий ва маданий меросни муҳофаза қилиш, тиклаш ва улардан фойдаланиш маркази директори Жандўс Қурбан «Туркистон вилоятидаги тарихий ва маданий мерос иншоотларининг ҳолати» мавзуида маъруза қилди.

 Ҳозирги кунда вилоятда 1770та тарихий ва маданий мерос иншоотлари рўйхатга олинган. Moнументал санъат иншоотлари ва ёдгорлик лавҳалари сони – 831та. 

Йиғилишда маданий ва тарихий ёдгорликларни муҳофаза қилиш масалалари ҳам муҳокама қилинди. Баъзи ҳокимликлар ер участкаларини тарихий ва маданий ёдгорликлар, археологик қазилмалар мавжудлигини текширмасдан фойдаланишга беришган. Қонунга мувофиқ, ер участкалари тарихий ва маданий экспертизадан ўтказилиши керак. Мутахассисларнинг таъкидлашича, агар бу жараён давом этса, тарихий меросимиздан айрилиб қолишимиз мумкин. 

Вилоят ҳокими муовини ушбу масалаларни ўрганиб, аниқ тавсиялар беришни тайинлади. 

Йиғилишда Жетисай, Тўлебий, Чордара, Ўрдабоши, Сайрам туманлари ва Туркистон ҳамда Кентов шаҳарлари ҳокимликларининг таклифлари кўриб чиқилди.