Туркистон вилоят ўзбек этномаданият бирлашмаси раиси ўринбосари, “Улес” хайрия жамғармаси раиси Райимжон Қўчқоровнинг ташаббуси билан ўтказилаётган “Китобсеварлар клуби” фаолияти нафақат вилоятимиз, балки бутун республикамизга ибрат бўлаётгани ҳақиқат.

Ёшлар орасида саводхонлик, китоб мутолаасини тарғиб этишни кўзловчи ушбу ташаббус аллақачон амалда ўз исботини топиб улгурди. Туркистон вилояти ташкил топганининг 5 йиллиги муносабати билан уюштирилган “Менинг устозим” танловида мен ҳам иштирок этиш бахтига муяссар бўлдим. 

Тадбирда Сайрам тумани, Қорабулоқ қишлоғидаги 101-сонли мактаб жамоасидан Зокиржон Абдуқодиров, Шаҳло Қурбонбоева, Садоқат Абдуқодирова, Унсуной Эргешова, М. Юсанова, “Қайнарбулоқ” ўрта мактабидан эса Замира Камолова, Фотима Йўлдошбекова, Паризода Тошниёзовалар ўз шогирдлари Севинч Раҳматуллаева, Робия Фурқат қизи билан қатнашиб, ғолиблар сафидан жой олишди.

Зокиржон Абдуқодиров “Көне Туркістан перзенті” медали билан мукофотланса, қолган иштирокчилар “Улес” хайрия жамғармаси томонидан “Фахрий ёрлиқ” ҳамда қимматбаҳо совғалар билан тақдирланишди.

Ўша куни “Китобсеварлар клуби” беллашувининг азиз меҳмони бўлиб, китоб мутолааси борасидаги қизиқарли савол-жавоблар гувоҳи бўлдик. Ҳар бир гуруҳ маълум бир муддат бўйича берилган саволларга жавоб қайтариб, зукколиги, билимдонлигини намоён этди.

Рости, иштирокчиларнинг зукколиги, китоб мутолаасига бўлган иштиёқининг юксаклиги бизни ҳайратда қолдирди. Қани энди ушбу эзгу тадбир вилоятимизнинг ҳар бир туман ва қишлоқларида йўлга қўйилса...

Хуллас, кўҳна шаҳарга уюштирилган бир кунлик сафаримиз, қалбимизда сақланиб қолишига шак-шубҳа йўқ.