Чорак аср муқаддам илк бор Шимкент шаҳрида “Южный Казахстан” газетаси раҳбари Юрий Кирюхин ташаббуси билан ташкил этилган халқаро “Қозоқ романсиада” танлови ёш истеъдодларни кашф этишда улкан ҳисса қўшмоқда. Вилоят славян этномаданият бирлашмаси раҳбари, “Южный Казахстан” газетаси бош муҳаррир – директори Марина Лимаренко ҳамда ҳакамлар ҳайъати раҳбари, Россияда хизмат кўрсатган артист Галина Преображенскаянинг саъй-ҳаракатлари билан йигирма бешинчи марта ўтказилаётган халқаро романсиада танловига Қозоғистон, Ўзбекистон, Тожикистон ҳамда Россиянинг Москва шаҳридан жами 160дан зиёд турли ёшдаги санъаткор иштирок этди.

Шимкент шаҳрида мактаб ўқувчилари ўртасида ўтган халқаро танлов ғолиблари – тошкентлик Фирдавс Юсупов билан оқсувкентлик Муродали Сердали келаси йили 13 апрелда Москва шаҳрида ўтадиган жаҳон танловига йўлланма олишди. Якуний ҳисобот концерт аввалида вилоят маданият бошқармаси бошлиғи Азимхан Қўйлибаев ҳамда “Южный Казахстан” газетаси раҳбари Марина Лимаренко томошабин ва санъаткорларни қутлаб, саҳнага Москвадан келган ҳакамлар ҳайъати раисаси Галина Преображенскаяни чорлаб, вилоят ҳокимлиги номидан ташаккурнома ва гулдастани тантанали тақдим этишди. 

Туркистон вилояти марказида ўтган, қозоқ ва рус тилларида ижро этилган романслар якуни бўйича ҳакамлар ҳайъати қарорига кўра, йигирма бешинчи халқаро романсиада ғолиби, деб топилган иқтидорли санъаткорлар билан танишинг. Учинчи ўринни Алихан Бейсеков (Алмати), Амангелди Ердаулет (Шимкент), Қалдар Қадирбек, Абдуллозода Шерзод (Душанбе) эгаллашди. Иккинчи ўринга Салтанат Мурат қизи (Алмати), Муҳаммадюсуф Абдуқодиров (Фарғона), Мухтар Ахметов (Алмати), Аружан Қусаинова (Алмати), биринчи ўринга эса Диляра Дуйсекеева (Кўкчатов) ҳамда Абдулла Саят (Алмати), Жулдиз Байжума (Алмати), Алиш Бибарис (Астана) муносиб деб топилди. Бош совринни эса Тошкентдан ташриф буюрган юксак маҳорат соҳиби Отабек Назиров енгиб олди. 

Танлов ташкилотчиси М. Лимаренко халқаро анжуманнинг юксак савияда ўтишига ҳиммат кўрсатган вилоят ҳокимлиги ҳамда турли давлатлардан келган нуфузли санъаткорларни “Карвонсарой”да тайёрланган мазали “Чойхона палов” билан меҳмон қилган Туркистон шаҳар ўзбек этномаданият бирлашмаси раиси Баҳодир Ирисметовга, анжуманга келган ҳамкасби “Жанубий Қозоғистон” бош муҳаррир – директори Райимжон Алибоевга самимий миннатдорчилик билдирди.