Туркистон шахрида «Буюк Дашт эли» маркази биносида вилоят ўзбек этномаданият бирлашмаси кенгашининг кенгайтирилган йиғилиши ўтди. Бирлашма раиси Баҳодир Ирисметов 6 ой мобайнида амалга оширилган ишлар юзасидан ҳисобот бериб, галдаги режаларга тўхталди.

Вилоят узбек этномаданият бирлашмасининг ташаббуси билан вилоят ўзбек драма театрини ташкил этиш борасида амалий ишлар бошланиб кетди. Вилоят ўзбек этномаданият бирлашмаси раисининг 13 нафар муовини сайланди. Шу жумладан, бирлашма қошидаги оқсоқоллар кенгаши раиси этиб таниқли жамоат арбоби Зуппархон Чолдонов, хотин-қизлар кенгашига раиса этиб Ҳамза номли ўрта мактаб директори Дилбар Дийметова, ёшлар уюшмасига раис этиб жамоат фидойиси Бекзод Ҳабибов сайланди. Таниқли педагог ва жамоат фидойиси Ўсмонали Қодиров, Бахтиёр Шомуродов, Шомирза Мадалиев ва Жавлон Собитовлар туманлардаги раис ўринбосарлари этиб сайланди. Зокир Бекенов спорт ишлари бўйича муовин бўлди.

«Жанубий Қозоғистон» – ҳар бир хонадонга!» акцияси доирасида миллий газета обунасида фаоллик кўрсатган туман ва шаҳар ўзбек этномаданият бирлашмаси раислари муносиб тақдирланди. Режани 150 фоиз бажарган Саврон туман ўзбек этномаданият бирлашмаси раиси Қурбонбой Ирисбеков 1-ўринга ноил бўлди. Ушбу тадбирда муносиб иштирок этган барча ўзбек этномаданият бирлашмалари раисларига ЎЭМБ раиси Б. Ирисметов ва «Жанубий Қозоғистон» вилоят газетаси бош муҳаррири Р. Алибоевлар махсус совғаларини топширишди. 

Шунингдек, «Жанубий Қозоғистон» вилоят газетаси тахририятида фаолият юритаётган бир гуруҳ журналистлар ҳам муносиб тақдирландилар.