Давлат раҳбари халққа йўллаган Мактубида аҳолининг фаровонлигини ошириш асосий мақсад эканлигини алоҳида таъкидлади.

Вилоят ҳокими Дархан Сатибалди туман, шаҳар ҳокимларига сармоя жалб қилиш орқали янги иш ўринлари яратиш борасида аниқ топшириқлар юклаган эди. Мазкур топшириқнинг ижросини таъминлаш мақсадида Саврон тумани ҳокимлиги ташаббуси билан тадбиркорлардан иборат делегация Хитой давлатига хизмат сафари билан борди.

Сафардан кўзланган асосий мақсад – вилоятга сармоя жалб қилиш, икки томонлама савдо ва иқтисодий ҳамкорликни кучайтириш ва маҳаллий тадбиркорлар билан тажриба алмашиш эди.

Савронликлар дастлаб Боро-Тала шаҳридаги Арасан мавзесидаги корхоналарни оралади. Балиқчилик, қўзиқорин ва ширин маккажўхори ишлаб чиқариш ишлари билан танишишди. Хитойдаги аква маданият маҳаллий аҳолининг шоли етиштириши туфайли ривожланган. Гуруч етиштириш бўйича хитойликлар кўп йиллардан буён карвонбошилик қилмоқда. Шаҳарда балиқчилик ҳам юксак даражада ривожланган. Хусусан, “Салқин сув” балиқчилик хўжалигида балиқларнинг узунлиги 4-5 метрга етади, вазни эса 90 килограммдан ошади.

Делегациянинг сафари Қорабуқа қишлоғида давом этди. Ушбу минтақада маккажўхори етиштириш ва уни қайта ишлаш юксак даражада ривожланган. “Шин Нонг” компанияси 350-400 гектар ерда маккажўхори етиштириб, ширин жўхори экспорт қилади. Қўзиқорин етиштирадиган “Кен юань” корхона фаолияти билан яқиндан танишган делегация аъзоларига иш услублари батафсил тушунтирилди. Умуман Хитойда қўзиқориннинг 22 тури истеъмол қилинса, бу ерда 11 тури етиштирилар экан. 

Хизмат сафарининг иккинчи куни савронликлар пахта етиштириш, уни қайта ишлаш, уруғчилик ишлари билан танишди. Арасан шаҳри раҳбарлари билан учрашув ўтказиб, уларни Туркистон шаҳрига таклиф қилишди. Тадбиркорларнинг Хитойга хизмат сафари ҳафта охиригача давом этади.