Туркистон шаҳрида Қозоғистон-Корея ҳамкорлигида барпо этилаётган университет қурилиши давом этмоқда. Ушбу ташаббус Президент Қасим-Жўмарт Тўқаевнинг таълим сифатини ошириш учун жаҳондаги илғор олий ўқув юртларининг филиалларини мамлакатимизда очиш вазифаси ижросини таъминлаш муносабати билан йўлга қўйилган.

Вилоят ҳокими Нуралхан Кўшеров қурилишнинг боришини кўздан кечириб, ўз тавсияларини берди. Мутасадди раҳбарлар ва пудратчи компания етакчилари билан фикр алмашиб, бажарилаётган ишлар ҳисоботини тинглади.

– Қурилиш жорий йилда тугалланиб, ўқув йилига тайёр бўлиши керак. Шу сабабли, қурилиш суръатини пасайтирмай, ишлар сифатли бажарилиши зарур, – дея Н. Кўшеров 18 қаватли иморатни айланиб кўрди ва сифатли қурилиш материалларидан фойдаланиш зарурлигини таъкидлади.

Ҳозир бинонинг ташқи қисмини қоплаш, деразалар қўйиш олиб борилмоқда. Иншоотни август ойида топшириш режаланган бироқ, пудратчи-бинокорлар уни май ойида топширишмоқчи. 

Таъкидлаш жоиз, ўтган йили мутасадди вазирлик ва Туркистон вилоят ҳокимлиги томонидан Кореянинг 70 йиллик тарихга эга Woosong университети раҳбарияти билан музокаралар юритилган эди. Натижада, Туркистон шаҳрида мазкур ўқув юртининг бўлимини очиш юзасидан шартнома имзоланган. Университетда IT ва бошқа техник мутахассисларни тайёрлаш, шунингдек, ишлаб чиқариш, қишлоқ хўжалигини янгича йўналишда ривожлантириш учун мутахассислар тайёрлаш ҳам кўзда тутилган.