Туркистон вилоятида бунёд этиладиган ҳар бир иншоотнинг меъморий қиёфаси, қурилиш сифати ва амалдаги қонун талабларига мувофиқлиги қатъий назоратга олинган. Шу мақсадда вилоят ҳокими Нуралхон Кўшеров раислигида меъморий лойиҳалар бўйича кенгашнинг навбатдаги йиғилиши ўтди. Унда ҳудуднинг меъморий қиёфасини яхшилаш, сайёҳлик салоҳиятини ошириш ва сармоя жалб қилишга қаратилган 11та лойиҳа кўриб чиқилди.

Кенгаш жараёнида вилоят ҳокими лойиҳалар сифатига, қонун талабларининг бажарилишига ва меъморий режаларнинг ҳудуднинг ўзига хос қиёфасига мос бўлишига алоҳида эътибор қаратди.

– Ноқонуний қурилишга йўл қўйилмайди. Барча лойиҳанинг қонун талабларига тўлиқ мувофиқлигини таъминланглар. Ҳар бир масъул шахс зиммасидаги вазифаларни сифатли ва ўз вақтида бажарса, ҳеч қандай муаммо бўлмайди. Маъқулланган лойиҳаларни амалга ошириш жараёнини қатъий назорат қилинсин, – деди Нуралхан Кўшеров.

Мулоқот чоғида Сариоғоч темир йўл вокзали ҳудудини ободонлаштириш лойиҳаси ва “Туркистон – Қарноқ” сайёҳлик йўналиши доирасида очиқ осмон остидаги археология боғининг меъморий концепцияси таништирилди. Шунингдек, вилоят марказидаги қадимги Арбат ва темир йўл вокзали атрофидаги ҳудудни ободонлаштириш ва кўкаламзорлаштириш лойиҳалари кўриб чиқилиб, улар юзасидан тегишли таклифлар берилди.

Бундан ташқари, хусусий сармоядорлар ўз маблағлари эвазига Туркистон шаҳрида умумий майдони 1,6 гектарли замонавий савдо-кўнгилочар маркази, ёқилғи қуйиш станцияси, автотранспортга мажмуавий хизмат кўрсатиш маркази, шунингдек, ресторан ва меҳмонхона барпо этиш лойиҳаларини тақдим этишди. Кенгаш аъзолари иншоотларнинг меъморий қиёфаси, хусусиятлари ва инфратузилмага таъсири ҳақида фикр-мулоҳаза юритишди.

Йиғилишда маҳаллий тадбиркорлар қиймати 4,8 млрд тенге бўлган Туркистон тиббиёт-сайёҳлик марказини қуриш лойиҳасини ҳам тақдим этишди. Лойиҳа тўлиқ хусусий сармоя эвазига амалга оширилади.

Шу билан бирга тадбиркорлардан бири шарқ меъморчилиги услуби ва миллий нақш уйғунлашган таунхаус мажмуаси лойиҳасини кўпчилик эътиборига ҳавола қилди. Лойиҳа ҳудуднинг меъморий ўзига хослигини таъминлаган ҳолда амалга оширилади.

Ҳар бир лойиҳа юзасидан масъул шахслар ва сармоядорларга аниқ тавсиялар берилиб, маъқулланган лойиҳаларнинг сифатли ва қонун талабларига мувофиқ ҳаётга жорий этилиши назоратга олинади.