Вилоят ҳокими Нуралхан Кўшеров Темирлан қишлоғида жойлашган “Темірлан” ишлаб чиқариш ҳудудидаги корхоналарни оралаб, қурилиш жараёни билан танишди.

Умумий майдони 10,5 гектардан иборат ҳудудда 5та ишлаб чиқариш биносининг қурилиши якунланиб, фойдаланишга топширилган. Айни дамда қиймати 1,2 миллиард тенгелик 5та сармоявий лойиҳа амалга оширилиб, 53 янги иш ўрини очилди. Шунингдек, саноат паркида янги иншоотлар қурилиши давом этмоқда. Бу ишларни “Оңтустік Жарық Транзит Монтаж” МЧБ пудратчи компанияси олиб бормоқда. 

Дастлаб вилоят раҳбари кир ювиш кукуни ва суюқ ювиш воситалари ишлаб чиқарадиган “ALMEN GROUP” ва ХТ “Б. Байдулла” корхоналарида бўлди. Уларда йилига 5 минг тонна маҳсулот ишлаб чиқарилади. Шунингдек, металл буюмлар ишлаб чиқарадиган “ҚАРАБАТЫР АГРО” МЧБ фаолияти ҳам кўздан кечирилди. Завод йилига 4 минг тонна маҳсулот ишлаб чиқариш қувватига эга. Бундан ташқари, ем ва гидропоник маҳсулотлар ишлаб чиқарадиган “BAYSAL-A” МЧБнинг иш тизими тақдим этилди. “Facade Company” МЧБ йилига 100 минг квадрат метр ойна ишлаб чиқаради. Бу ерда 10 киши доимий иш билан банд.

Вилоят ҳокими ташаббуси билан минтақада саноат ва қайта ишлаш соҳасини ривожлантиришга йўналтирилган йирик сармоявий лойиҳалар тизимли равишда амалга оширилмоқда.