Вилоят ҳокими Нуралхан Кўшеровнинг туман, шаҳар аҳолиси билан учрашувлари давом этмоқда. Галдаги учрашув Тулкибош тумани аҳолиси билан ўтди.

Учрашувда вилоят раҳбари туманнинг ижтимоий-иқтисодий кўрсаткичлари, эришилган натижаларга тўхталди.

– Туманнинг асосий ижтимоий-иқтисодий тараққиёти кўрсаткичларида ижобий ўсиш сезилмоқда. Бу ютуқлар – энг аввало, туман аҳолисининг бирлиги ва ҳамжиҳатлиги, шунингдек, давлат дастурларининг тизимли ижросининг аниқ натижаси. “Тоза Қозоғистон” экологик дастури ҳудудларда самарали амалга оширилмоқда. Жорий йил 1 июлдан Янги Конституция кучга кирди, 23 август куни Қурултой сайлови ўтади. Қурултой сайлови – элимизнинг ижтимоий-сиёсий ҳаётидаги муҳим воқеа, мамлакатнинг барқарор тараққиёти ва келажагига йўналтирилган муҳим қадам, – деди Нуралхан Ўралбайули ва аҳолини сайловда фаол иштирок этишга чақирди.

Туманда ижтимоий иншоотлар қад ростлаб, аҳоли фаровонлиги юксалмоқда. Тулкибош кентида янги темирйўл вокзали очилди. Ўтган йили Даубаба аҳоли манзилида 100 ўринли маданият уйи фойдаланишга топширилди. Майтўбе қишлоғидаги ўйингоҳ тўла таъмирланмоқда. Шунингдек, 100 ўринли Бақибек қишлоқ клуби, Интимақ қишлоғидаги 200 ўринли маданият уйларининг қурилиши жадал суръатларда олиб борилмоқда.

Туман ҳокими Асқар Естибаев тумандаги сармоявий лойиҳалар асосида амалга оширилаётган ишлар бўйича маъруза қилди. Учрашувда фуқаролар томонидан инфратузилмани ривожлантириш, таълим, соғликни сақлаш соҳаларига оид таклиф ва мурожаатлар янгради. Вилоят ҳокими ҳар бир масалани диққат билан тинглаб, мутасадди бошқармалар ва туман ҳокимлигига тегишли топшириқлар берди.