“Тоза Қозоғистон” экологик тадбири доирасида Сайрам тумани ҳокими Мадияр Ўразалиевнинг ташаббуси билан Қорабулоқ қишлоғида шанбалик ўтди.

Унда туман ҳокимлигининг бўлим раҳбарлари, мутахассислар, тумандаги этномаданият бирлашмалари раҳбарлари, фахрийлар қишлоқ ҳокимликлари ходимлари, маҳалла қўмиталари раислари, фаоллар, “Көрікті Сайрам” корхонаси ходимлари, ОАВ вакиллари иштирок этди. Тадбирда Аҳмаров ҳамда Шимкентқопқа кўчалари чегарасидаги Қорасув анҳори атрофини тозалаш ишлари уюштирилди. 

Ободонлаштириш ишларидан сўнг янги қиёфага эга бўлган Қорасув кўли бўйидаги “Учқўрғон” булоғининг очилиш маросими ўтди. Тадбирда туман ҳокими Мадияр Ўразалиев, туман фахрийлар кенгаши раиси Сиқимбай Сағиндиқов, вилоят ўзбек этномаданият бирлашмаси раисининг ўринбосари Бахтиёр Шомуродовлар сўзга чиқиб, иштирокчиларга миннатдорчилик билдиришди.

М. Ўразалиев булоқлар кўзини очиш, ҳудудни ободонлаштириш ва кўкаламзорлаштиришга салмоқли ҳисса қўшган, шунингдек, ҳомийлик қилган тадбиркорларга фахрий ёрлиқлар топширди.