Арис шаҳрига қарашли Аққала қишлоғи аҳолиси узоқ вақтдан буён кутган табиий газ етказиб берилди. Тантанали тадбирда шаҳар ҳокими Қайсар Манқараев иштирок этиб, қишлоқ аҳолисини ушбу қувонч билан табриклади.

Тантана давомида табиий газ машъали ёқилиб, Аққала қишлоғини газлаштириш лойиҳаси расман ишга туширилди.

Шаҳар ҳокими ўз сўзида табиий газнинг кириб келиши қишлоқ аҳолисининг турмушини енгиллаштириб, аҳоли турмуш тарзини яхшилашга хизмат қилишини таъкидлади.

Аққала қишлоғида 1043 нафар аҳоли истиқомат қилади, 156та хонадоннинг барчасига табиий газга уланиш имконияти яратилди. Эндиликда аҳоли уйларини табиий газ билан иситиш ва кундаликда «зангори олов»дан фойдаланиш имкониятига эга.

Тадбирдан сўнг шаҳар ҳокими биринчи бўлиб табиий газга уланган хонадонлардан бири – оқсоқол Тўйлибай Ералиевнинг уйига бориб, оиланинг қувончига шерик бўлди.

Қишлоқ оқсоқоллари ва аҳоли узоқ кутилган масаланинг ижобий ҳал этилганидан мамнунликларини билдириб, миннатдорчилик изҳор этдилар.

Таъкидлаш жоиз, бунга қадар Арис шаҳрига қарашли Байирқум, Кўкжиде ва Жидели қишлоқлари табиий газга уланган эди. Бундан ташқари, Ақдала ва Қаражантақ қишлоқларини газлаштириш ишлари ҳам давом этмоқда.