Қозоғистонда машиналарни йиллик устамаси 4 фоиз бўлган тартибда сотиб олиш мумкинми? Шу ҳақда маълумот берсангиз.

О. МАВЛОНОВ. 

Туркистон вилояти.

Давлатнинг имтиёзли автонасиясига бугунги кунда қозоғистонликлар ўртасида талаб катта экан.

Бунинг сабаби нимада?

Қозоғистонда 5 йил аввал татбиқ этила бошлаган имтиёзли автонасия дастури, айтиш керакки, бугун ҳам долзарблигини йўқотмади. Давлат бунинг учун маблағни аямаяпти, қозоғистонликларга арзон баҳода, яъни 4 фоизли насия билан машинали бўлиб қолиш имконини беряпти.

Ўтган йили дастур оператори – Қозоғистон тараққиёт банки янгилик эълон қилди, яъни 2019 йил 18 декабрда у иккинчи даражали банкларга 5,5 млрд. тенге юбориб, молияни имтиёзли автонасия учун сарфлашни юклади.

Бундан сал олдинроқ, яъни октябрь ойида мазкур дастурга 14,5 млрд. тенге йўналтирилгани маълум қилинганди.

Бу маблағни учта банк (Halyk Bank, Сбербанк ва ВТБ банк) ўзаро тақсимлаб олган.

Ҳар сафар маблағ керак бўлса, оператор банк уни Қозоғистон барқарорлик жамғармасидан олиб туради. 

Шундай қилиб, 2015 йилдан буён олинган пул (81,8 млрд. тенге)га қозоғистонликлар 17644 автомобиль харид қилган.

Дастур қачонгача амал қилади?

У 20 йилга мўлжалланган. Айтиш керакки, давлат дастури қозоғистонликларга маъқул бўлмоқда, яъни бир йилга олинган пул уч ой ичидаёқ ўзлаштирилмоқда.

2020 йилда ҳам дастур шартлари ўзгаришсиз қолди. 

Насия бўйича тўланадиган йиллик устама – 4 фоиз;

- насия муддати – 7 йил;

- қарз валютаси – тенге;

- битта енгил автотранспорт нархи – 15 млн. тенгедан ошмаслиги керак;

- автомобиль ишлаб чиқарадиган мамлакат – Қозоғистон.

Бугунги кунда харидор таклиф этилган 40та машина моделидан биттасини танлаш ҳуқуқига эга (маълумотлар 2020 йил январга оид).

“Азия Авто” ва “СарыаркаАвтоПром” корхоналари ишлаб чиқарган автомобилларни сотиб олиш мумкин.

Бугунги кунда дастур иштирокчилари  – 7та банк имтиёзли автокредит олувчиларга аризасига қараб хизмат кўрсатмоқда. 

Дастур қандай наф беради?

Автокредит лойиҳаси йўлга қўйилгандан буён автомашина сотиш ҳажми анча, 43 фоизга ўсган. Банк ходимлари ҚРдаги барча автосалонларда маҳаллий автомашиналарнинг сотилишини таъминламоқда.

Дастур оммалашди, қозоғистонликлар унда иштирок этиш учун навбатга туришмоқда. Чунончи, ВТБ банкидан насия олиш учун мижоз камида 1-2 ой кутиши керак.

Лекин бунда машина модели ҳам роль ўйнайди. Масалан, Hyundai Tucson олиш учун 3 ой навбатда туриш шарт.

Ҳужжатларни расмийлаштириш ва текширувлардан ўтиш учун ҳам бир-икки ҳафта вақт кетади. Банк насия аризасини тасдиқласа, сотиб олинган машина автосалонга 20 кун ичида етказиб берилади. 

 Шунинг учун банкларнинг автоишлаб чиқарувчидан тасдиқловчи ҳужжатни олиш ва сўралган автомобилнинг бор-йўқлигини билиш учун олдинроқ ҳаракат қилиши муҳим. Айтганча, банкларнинг аризани кўриб чиқиш муддати – 15 кун.