Йил охирлаб қолди, ишларни сарҳисоб қиладиган паллага етдик. Маълумки, бу йил  Қозоғистонда жисмоний шахслар учун солиқ амнистияси эълон қилиниб, аҳоли учун муайян даражада имтиёзлар яратилди.

Ундан кимлар фойдаланди, кимлар йўқ. Муштарийларимизга солиқ амнистияси дастакларини тушунтириш мақсадида қуйидаги мақолани эътиборингизга ҳавола этамиз.

Амнистия қачон эълон қилинди ва мақсади нима?

Қозоғистонда 2020 йил 24 августдан бошлаб жисмоний шахсларнинг мол-мулкига солинадиган солиқлар бўйича жарималарни ҳисобдан чиқариш мақсадида солиқ амнистияси ўтказилмоқда, бу тўғридаги ҳужжат Давлат раҳбари томонидан 2020 йил 2 июнда имзоланган.

Кимларга фойдаси тегди?

Қозоғистонда солиқлар мол-мулк, хусусан, транспорт, ер, мулк учун ундирилади.

Бу йил карантин туфайли давлат даромадлари идоралари солиқ тўламаганларга нисбатан мажбурий чора-тадбирларни қўллашмади. 

Аксинча,  қарзи бўлган барча фуқароларни шу йил охиригача амалга оширилаётган солиқ амнистиясидан фойдаланиб қолишга даъват этишмоқда.

Бунинг учун сиз асосий қарзингиздан тўлиқ қутулишингиз зарур. Устидаги пенясини ўчириш учун ҳеч қандай жойга боришингиз шарт эмас. Солиқ мажбуриятлари бўйича қарзнинг асосий миқдорини солиқ даврлари (2020 йил 1 январгача бўлган) учун тўлаш кифоя. Жарима фоизлари автомат равишда ўчирилади.

Шунингдек, 2020 йил 1 апрелдан кейин асосий қарзни ва ўтган солиқ даври учун фоизлар миқдорини тўлаган фуқаролар давлат даромадлари идораларига мурожаат қилиб, депозит маблағларини қайтариб беришлари ёки ушбу пулларни келгуси тўловлар ҳисобига ўтказишлари мумкин.