Туркистон шаҳрида барпо этилаётган замонавий иншоотлар жаҳон меъморчилиги йўналишларини қамраб олган нодир қирралари билан унинг бунёдкорлик равнақида ўзига хос ўринни эгалламоқда. Уларнинг пайдо бўлишига қадим ва навқирон шаҳарнинг ҳар бир мавзеси ва турли даврдаги меъморий тараққиёти ўз таъсирини кўрсатмоқда.

Буюк Ипак йўлидаги қадимий шаҳар бугун туркий халқларнинг маънавий пойтахтига айланди. Арис шаҳри ҳокимлиги кўмаги билан маҳаллий фахрийлар ушбу шаҳарга ташриф буюриб, янгиланган Туркистоннинг қурилиши билан танишдилар.
Қозоғистон Республикаси Президенти Қасим-Жўмарт Тўқаев “Туркистон нафақат қозоқ халқи, балки бутун туркий олам учун муқаддас қадамжо. Туркистондаги меъморий обидаларда аждодларимизнинг юксак ақл-заковати ўз ифодасини топган. Бу беназир шаҳар инсониятнинг кўп асрлик тараққиёти гувоҳи ва тамаддуни дурдонасидир», деган эди. Шаҳарда қозоқ халқи учун муҳим қарорлар қабул қилинган.
Арис шаҳри ҳокими Гулжан Қурманбекова “Туркистонни тиклаш – мисли кўрилмаган, таҳсинга сазовор ташаббус. Маънавий пойтахтимиз равнақи учун барчамиз масъулмиз”, дея муқаддас шаҳарга сафарга чиққан меҳнат фахрийларига оқ йўл тилади.
...Бугун қадимий Туркистоннинг тепаликлари, шу жумладан, Култўбе қалъаси, гумбазлари тонгги қуёш нурида ял-ял товланаётган обидалар, буюк алломалар мангу ором топган, бугунги авлодлари бунёдкорлик шавқи, эзгу ният ва мақсадлар-ла янгиланаётган бу азим шаҳар ўзининг яна бир мунаввар тонгини қарши олмоқда...