2023 йил 14 ноябрда Қозоғистон аҳолиси 20 миллионга етди ва тарихий воқеа қайд этилди. 20 миллионинчи фуқаронинг бири Туркистон вилоятининг Жетисай туманида дунёга келди. Чақалоқнинг исми Асқар Алимхан Ерғалиули.

Туркистон вилояти ҳокими Дархан Сатибалди Жетисай туманидаги “Асиқата” шифохонасига ташриф буюриб, 20 миллионинчи чақалоқнинг ота-онасини табриклади. У мамлакат Президенти Қасим-Жўмарт Тўқаевнинг табригини етказди.

– Бугун биз юртимиз учун тарихий ва бахтли онларда учрашяпмиз. Мамлакат аҳолиси 20 миллионга етди. 20 миллионинчи фуқаронинг бири вилоятимизда, Асиқата қишлоғида дунёга келди. Унинг ота-онаси ва барча вилоят аҳолисини чин қалбимдан табриклайман. Хабарингиз бор, шу муносабат билан Давлат раҳбари Қасим-Жўмарт Кемелули мамлакатимиз аҳолисига табрик йўллади. Бугун биз Президентимиз табригини тантанали равишда етказиш учун келдик. Буюк Даштнинг пойдевори насли билан мустаҳкам. Қозоқ мамлакатининг 20 миллионинчи фуқароси муқаддас Туркистон вилоятида туғилганидан жуда хурсандмиз. Биз қаҳрамон оналаримиз билан фахрланамиз. Республикамизда ҳар йили туғилган 400 мингдан зиёд боланинг ҳар еттинчиси Туркистон вилоятида дунёга келади. Бугунги кунда вилоят аҳолиси 2 миллиондан ошди. Туркистон вилояти республика демографик юксалишига алоҳида ҳисса қўшмоқда. Бу юртимиз, барчамиз учун фахрдир. Бугун улкан тарихий воқеанинг гувоҳи бўлдик. Бундай қувонч барчамизга насиб этсин! Қозоғистонимиз ва Туркистонимиз абадий бўлсин! – деди Дархан Сатибалди ва 20 миллионинчи фуқаронинг ота-онасига Президент номидан қимматбаҳо совғани топширди.