Ўтрор тумани ҳокими Сакен Султанханов туман кўпкари федерацияси раиси ва чавандозларини қабул қилиб, туманда от спортини ривожлантириш масалаларини муҳокама қилди.

Йиғилишда туман раҳбари миллий спорт турини улуғлаётган чавандозларни Туркистон вилояти биринчилигида ғолиб чиққани билан табриклади.

– Вилоятда чавандоз ёшлар сафи кенгаймоқда. Ёшларнинг спортнинг ушбу турига қизиқиши ортиб бораётгани бу борада амалга оширилаётган ишлар самараси, деб биламан. Бу ёшларимизни ёт хатти-ҳаракатлардан йироқлатиб, куч-ғайратини фойдали фаолиятга йўналтириш имконини беради. Шу муносабат билан туманда от спортига алоҳида эътибор қаратиб, кенг кўламли тадбирларни амалга ошириш зарур, – деди туман ҳокими.

Кўпкари федерацияси раиси Жумабай Сарсенбаев от спортини ривожлантириш борасидаги режалари билан ўртоқлашар экан, бу борада амалга оширилаётган ишларга атрофлича  тўхталди.

Йиғилишда туман ҳокими миллий спорт турларимиз ривожига ҳисса қўшган бир гуруҳ фуқароларни ташаккурнома ва совғалар билан тақдирлади.

Туркистон вилояти миллий спорт турларини ривожлантириш бўйича республикада етакчи. Вилоят чавандозлари Жаҳон кўчманчилар ўйинларида иштирок этишга тайёргарлик кўрмоқда.