Конституция куни ва янги ўқув йили арафасида вилоятимизда қатор бир янги мактаблар фойдаланишга топширилди. Шулардан бири – Қазиғурт тумани, Кўкибел қишлоғидаги Сабир Рахимов номидаги 300 ўринли мактаб. Аҳолини байрам билан табриклаш учун махсус ташриф буюрган вилоят ҳокими Дархан Сатибалди қишлоқ аҳли билан учрашди.

– Аҳоли билан мулоқотда мазкур мактаб масаласи кўтарилган эди. Муаммони ҳал қилиш учун маҳаллий бюджетдан маблағ ажратилиб, қурилиш ишлари якунига етказилди. Янги таълим муассасидан заковатли ва билимли ёшларимиз чиқсин. Давлат тараққиёти биринчи навбатда фуқароларнинг билим даражаси, тарбияси ва маданиятига боғлиқ. Шунинг учун ҳар қандай давлат ижтимоий соҳага эътибор қаратади. Бу давлатимиз раҳбарининг асосий талабларидан биридир. Бу ҳудудда кўплаб замонавий мактаблар, болалар боғчалари, шифохоналар, спорт иншоотлари барпо этилаётганини яхши биласиз. Бу ишлар тўхтамайди, – деди вилоят раҳбари.

Ободонлаштирилган мактаб ҳудудида дам олиш ва сайр қилиш зонаси, ўқувчилар учун спорт зали, ўйин ва спорт майдончаси мавжуд.

Таълим соҳасида 19,4 миллиард тенге тежалган маблағ ҳисобидан 20та мактаб барпо этилиб, 300дан ортиқ ўқув масканлари таъмирланмоқда. Бундай кенг кўламли ишлар муқаддам вилоят тарихида бўлмаган. Жорий йилда 13та мактаб қурилиши якунланиб, фойдаланишга топширилади. Шунингдек, вилоятдаги 4та яроқсиз ва 5та уч навбатли мактаб муаммоси тўлиқ ҳал этилади.

2023-2025-йилларда “Бадастир мактаб” лойиҳаси доирасида 63та янги мактаб қурилиши режалаштирилган бўлиб, улардан 29 таси жорий йилда фойдаланишга топширилади.