Билимлар куни Ўранғай қишлоғида барпо этилган 150 ўринли 3-сонли умумтаълим мактабига ташриф буюрдик. 

Қишлоқ ҳокими Берик Жумаахметули, мактаб директори Нурлан Қадиров, қишлоқ бийлар кенгаши раиси Жумағали Бекмурзаев, вилоят оқсоқоллар кенгаши аъзоси Обиддин Фахриддинов, мактаб бошланғич ўзбек этномаданият бирлашмаси раиси Раҳматулла Ёқубов, мактаб қурилишига ўз ерини ҳадя қилган муаллим Аширбой Манноповлар билан мулоқотда бўлдик. Марҳум Абдумуталлиб ҳожи Носиров кўп йиллар қишлоқ, шаҳар, туман ҳокимлари, депутатлар олдига ушбу мактаб қурилиши масаласини кўтаргани ҳақида газета саҳифаларида кўп ёритганмиз.

Қишлоқ бийлар кенгаши раиси Ж. Бекмурзаев фаол ҳамқишлоқлари билан бирга бўлғуси илм масканининг лойиҳа-смета ҳужжатларини ҳозирлаш, вилоят бюджетидан қурилишни бошлаш учун пул ажратишга эришгани ҳам шонли тарих. Икки қаватли замонавий спорт, мажлислар зали, ошхона, устахоналари, тиббиёт хонаси мавжуд мактаб биноси фойдаланишга топширилди. Эндиликда шу атрофда истиқомат қилувчи юзлаб ўқувчилар бир неча чақирим олисдаги М. Ауезов номли мактабга қатнамайдиган бўлишди. 

Илм масканининг тантанали очилишида Саврон тумани ҳокими Мақсат Танғатаров, туман таълим бўлими бошлиғи Ақмарал Батирбекова, ота-оналар ва ўқувчилар иштирок этишди.