Вилоятда 2025-2026 йилги иситиш мавсумига тайёргарлик ишлари авжида. Дарвоқе, вилоятда 7та корхона иссиқлик таъминоти бўйича хизмат кўрсатади. Уларнинг тасарруфида 1та энергетика мажмуаси, 34та марказлаштирилган қозонхона ва 1622та автоном қозонхона мавжуд. Ушбу иситиш марказлари орқали вилоятда 1297та таълим, 685та тиббиёт, 210та маданият, 7та бандлик, 73та спорт ва 737та кўп қаватли уй-жой бинолари иссиқлик билан таъминланади.

Вилоят ҳокимининг биринчи ўринбосари З. Жўлдасов раҳбарлигида ўтган йиғилишда иситиш мавсумига тайёргарлик ишлари пухталанди.

Энергетика ва уй-жой коммунал хўжалиги бошқармаси раҳбари ўринбосари Рўза Сариеванинг айтишича, иссиқлик мажмуалари учун зарур миқдорда ёқилғи ишлаб чиқарилмоқда. Умуман олганда, яқинлашиб келаётган иситиш мавсуми муваффақиятли ўтиши учун 109,7 минг тонна кўмир, 20 минг литр дизель ёқилғиси, 7,9 минг тонна мазут ва 27 627 минг м3 газ керак бўлади.  Бюджет ташкилотларининг қозонхоналари учун зарур бўлган кўмир ҳажмига аниқлик киритилмоқда ва ҳозирда харидлар юзасидан тендерлар ўтказилмоқда.

З. Жўлдасов бошқармалар ва туман ҳокимликларига кўмир етказиб бериш бўйича тадбирларни зудлик билан ташкиллаштириш ва коммунал хўжаликдаги корхоналарнинг молиявий муаммоларини ҳал қилиш чораларини кўришни топширди. Шунингдек, газ ўтказилган қишлоқлардаги ижтимоий иншоотларнинг қозонхоналарини газга ўтказиш ишларини режалаштириш, иссиқхоналарга кўмир етказиб беришни доимий назоратга олишни топширди.