Туркистон шаҳридаги Этноовул мажмуасида Қозоғистон халқининг тиллари байрами доирасида вилоят ўзбек этномаданият бирлашмасининг “Ўзбек тили, маданияти ва анъаналари” байрам-тадбири ўтди.

Қозоғистон халқи Ассамблеяси ва Қозоғистон ўзбеклари этномаданият бирлашмаларининг “Дўстлик” ҳамжамияти, вилоят ўзбек этномаданият бирлашмаси бош бўлган тадбирда ўзбек халқининг миллий таомлари, ҳунармандчилик кўргазмаси уюштирилиб, концерт дастури намойиш этилди.

Тадбирда Қозоғистон халқи Ассамблеяси Раисининг ўринбосари, ҚР Президенти Маъмурияти ҚХА Котибияти мудири Марат Азилханов, Ўзбекистоннинг Қозоғистондаги фавқулодда ва мухтор элчиси Бахтиёр Ибрагимов, ҚР Парламенти Сенати депутатлари Дархан Қидирали, Алишер Сотволдиев, Геннадий Шиповских, Амангелди Ғабдилкеримули, Ғалиасқар Тўлендиули, вилоят ҳокими ўринбосари Ертай Алтаев, шунингдек, вилоят ҚХА қошидаги Оқсоқоллар, Оналар кенгаши, этномаданият бирлашмалари раислари ва аъзолари иштирок этди.

Табрик нутқи сўзлаган ҚХА Раисининг ўринбосари Марат Азилханов, вилоят ҳокимининг ўринбосари Ертай Алтаев, Ўзбекистоннинг Қозоғистондаги элчиси Бахтиёр Ибрагимов ва Сенат депутатлари мамлакатимизда баракали бирликни мустаҳкамлаш масалаларига алоҳида эътибор қаратишди. Элчи жаноблари барча миллатларнинг она тилини ривожлантириш учун шароит яратиб берган Қозоғистон Ҳукуматига миннатдорчилик билдирди. 

Байрам тадбирида вилоят ижтимоий-сиёсий ҳаётида фаоллик кўрсатиб, жамоат тотувлиги ва умуммиллий бирликни таъминлашга ҳисса қўшаёган бир гуруҳ фуқаролар тақдирланди. Баракали бирликка чорлаган байрам тадбири санъаткорларнинг катта концертига уланиб кетди.