Давлат раҳбари Қасим-Жўмарт Тўқаев Қозоғистон халқига йўллаган Мактубида мамлакатимизнинг янги тарихий босқичдаги тараққиёт йўлини белгилаб берди. Менинг фикримча, Мактубнинг бош ғояси – сиёсий янгиланишни иқтисодий ўзгаришлар билан уйғунлаштириб, унинг натижасини ҳар бир фуқаронинг ҳаёт сифатига айлантиришдир.

Мамлакатимизнинг сиёсий тизимлари янгиланди. Эндиги муҳим қадам – ушбу ўзгаришларга мос равишда бошқарув сифатини, жамоатчилик онгини ва фуқаро масъулиятини оширишдир. Мактубнинг аҳамиятини ҳам айнан шу яхлитликда кўраман.

Президентнинг “Авваламбор, онг янгиланиши керак” деган хулосасига алоҳида эътибор қаратдим. Жамиятда янги ахлоқни қарор топтириб, “Адолатпарвар фуқаро” мафкурасини кундалик ҳаётимизнинг ажралмас қисмига айлантириш вазифасини тўлиқ қўллаб-қувватлайман.

Мен учун ушбу тамойилнинг маъноси аниқ: фуқаронинг одиллиги – ўз ишига масъулиятидан, ватанпарварлиги – элга келтирган фойдасидан, давлатга ҳурмати – қонунга риоя қилишидан кўринади. Бундай тушунча оиладаги тарбиядан бошлаб, жамоатчилик муносабатлари ва давлат хизматигача қарор топиши зарур. Шунда янгиланган тизимлар янги жамоатчилик сифати билан бойийди.

Мактубдаги адолат ғоясининг салмоғи ҳам ана шунда. Ҳар бир фуқаро меҳнати қадрланишига, ҳуқуқи ҳимояланишига, фарзандининг келажагига йўл очилишига ишониши керак. Давлат тараққиётига бериладиган энг ҳаққоний баҳо – халқнинг кундалик ҳаётидаги ўзгаришдир.

Шу нуқтаи назардан Президент таклиф этган “Халқ қурилиши” ташаббусининг аҳамияти алоҳида. Аҳоли манзилларини газ ва тоза ичимли сув билан таъминлаш, ижтимоий иншоотлар барпо этиш, янги иш ўринларини яратиш ҳудудлар тараққиётига янги туртки беради. Ушбу ташаббусни аҳоли фаровонлигини оширишга ва ёш авлодга замонавий инфратузилмани қолдиришга қаратилган муҳим қадам сифатида қабул қиламан.

Давлат раҳбарининг 2027 йилни “Умумхалқ миқёсидаги қурилиш йили” деб эълон қилиш тўғрисидаги таклифини ҳам қўллаб-қувватлайман. Вилоят марказларидан тортиб туман, қишлоқларгача қурилиш ва янгилаш ишлари билан қамраб олиниши – мамлакатнинг мутаносиб тараққиёти учун зарур қарордир. Йўллар ва транспорт иншоотлари, тиббиёт муассасалари, алоҳида эҳтиёжманд болалар учун тиклаш марказлари, ижод уйлари, спорт мажмуалари, кутубхоналар ва илмий марказлар фуқароларга янги имкониятлар очиши керак.

Ушбу ташаббусда кенг маъно мужассам деб ўйлайман. Кутубхона ва илмий марказ билимга интилишни кучайтиради. Ижод уйи боланинг қобилиятини очади. Спорт мажмуаси соғлом авлодни тарбиялашга имкон беради. Шунинг учун қурилиш сифати билан бир қаторда, ҳар бир иншоот халққа қулай бўлиши ва мақсадли хизмат қилиши муҳим. Шунда мамлакатни янгилаш иши инсоннинг ривожланишига, жамиятнинг маънавий ва тафаккур салоҳиятининг ўсишига айланади.

Рақамлаштириш ва сунъий идрокни иқтисодиёт ҳамда давлат бошқаруви самарадорлигини оширишга йўналтириш ҳам муҳим. Бундай янгиланишнинг қадри инсонга хизмат қилиши билан ўлчаниши керак. Фуқаронинг вақтини тежайдиган, тадбиркорнинг ишини енгиллаштирадиган, қарор қабул қилишни тезлаштирадиган ўзгаришлар жамоатчилик томонидан қўллаб-қувватланишига ишонаман.

Мафкурага оид яна бир муҳим масала – билимга, фанга ва касбий меҳнатга бўлган ҳурмат. Ўқитувчининг обрўси, олимнинг изланиши, муҳандис ва шифокорнинг малакаси мамлакатнинг эртасини шакллантиради. Ёш авлод ана шундай меҳнатдан ўрнак оладиган жамоатчилик муҳитини яратиш – барчамиз учун умумий вазифа.

Президент белгилаб берган йўналишларни қўллаб-қувватлаган ҳолда, уларни амалга оширишдаги умумий масъулиятни алоҳида таъкидламоқчиман. Давлат идораларининг самарали фаолияти, жамият билан очиқ мулоқот ва ҳар бир фуқаронинг ҳалол меҳнати ягона оқимда бирлашгандагина ташаббуслар бардавом бўлади.

Бирдамлигимизни мустаҳкамлаб, билим ва меҳнатга таяниб, адолатни кундалик ҳаётнинг мезонига айлантириш – мамлакатимизнинг янги босқичдаги таянчидир. Ушбу йўлда ҳар биримизнинг қиладиган ишимиз, қўшадиган ҳиссамиз мавжуд.