Президент Қасим-Жўмарт Тўқаевнинг Қозоғистон халқига йўллаган навбатдаги анъанавий Мактубида мамлакатнинг янги тараққиёт босқичидаги устувор йўналишлари белгилаб берилди. Унда иқтисодиётни замонавийлаштириш, инфратузилмани ривожлантириш, энергия хавфсизлигини мустаҳкамлаш, транспорт ва логистика салоҳиятини ошириш ҳамда рақамли технологияларни кенг жорий этиш вазифалари белгиланди. Асосий мақсад – фуқароларнинг ҳаёт сифатини яхшилашдан иборат.

Бугунги дунёвий ўзгаришлар даврида ҳар қандай давлатнинг рақобатбардошлиги нафақат унинг иқтисодий имкониятлари, балки жамиятнинг бирлиги, фуқароларнинг масъулияти ва умумий мақсад сари бирлашиш қобилияти билан ҳам ўлчанади. Шу боис, Мактубда белгиланган вазифаларни амалга ошириш нафақат давлат идоралари, балки бутун жамият учун ҳам умумий иш бўлиши лозим. Ҳар бир ташаббуснинг аниқ натижа кўрсатиши, аввало, халқнинг кундалик ҳаётига қанчалик ижобий таъсир кўрсатиши билан баҳоланиши керак.

Мактубдаги 2027 – умумхалқ миқёсдаги кенг кўламли қурилиш йили деб эълон қилиниши борасидаги таклиф эътиборга лойиқ. “Халқ қурилиши” ташаббуси минтақалардаги йўллар, уй-жой-коммунал тизимлари, мактаб, касалхона, маданият ва спорт иншоотларини замонавийлаштиришга туртки бериши аниқ. Бундай ишлар аҳоли манзиллари қиёфасини ўзгартириб, янги иш ўринлари барпо этилишига ҳамда маҳаллий тадбиркорликнинг ривожланишига имкон беради.

Жануб минтақалари учун сув захираларидан оқилона фойдаланиш, қишлоқ хўжалиги маҳсулотларини чуқур қайта ишлаш ва қишлоқ инфратузилмасини такомиллаштириш масалалари муҳим. Шу боис, Мактубдаги ташаббуслар ҳар бир минтақанинг ўзига хос эҳтиёжларига мувофиқ амалга оширилса, уларнинг самараси аҳоли кундалик ҳаётида сезилади.

Мен раҳбарлик қилаётган “Жанубий Қозоғистон” газетаси жамоаси ҳам жамият ва ҳокимлик ўртасидаги очиқ мулоқотни мустаҳкамлашга масъулият билан ёндашиб, муштарийларни муҳим ижтимоий ташаббуслар ҳақида воқиф этади ва минтақа ижтимоий-иқтисодий тараққиётига алоқадор масалаларни илгари суради. Ахборотнинг ҳаққонийлиги, сўзнинг жиддийлиги ва жамоатчилик манфаатларига содиқлик матбуотнинг асосий тамойили ҳисобланади. Журналистларнинг асосий вазифаларидан бири – минтақа аҳолисининг овозини етказиш, уларнинг ташаббусларини қўллаб-қувватлаш ва жамиятда ўзаро ҳурмат ва ишонч маданиятини шакллантиришдир.