“Әділет” партияси учун таълим – давлатнинг келажагини белгилаб берувчи стратегик йўналишлардан биридир. Партия ўз фаолиятида ижтимоий адолат тамойилига қатъий амал қилган ҳолда, жамиятнинг ҳар бир аъзосига, айниқса, болаларга кўмак кўрсатишга алоҳида эътибор қаратмоқда. 

Янги ўқув йили арафасида “Әділет” партиясининг ташаббуси билан уюштирилган “Мактабга дадил қадам билан” акцияси Сайрам туманида давом этди. Акция доирасида партиянинг туман филиали ижтимоий ҳимояга муҳтож оилаларнинг 120 нафар фарзанди учун Шимкент шаҳридаги ҳайвонот боғига сафар уюштириб, болажонларга кўтаринки кайфият улашди. 

Шунингдек, Оқсувкент қишлоғида уюштирилган хайрия тадбирида болаларга ўқув қуроллари ва кийим-кечаклар топширилди. Тадбирда иштирок этган Сайрам тумани ҳокими Мадияр Ўразалиев, “Әділет” партияси вилоят филиали раиси вазифасини бажарувчи Қалийма Жантўреева болаларга самимий тилакларини билдирдилар.

– Янги ўқув йили – янги орзулар ва янги имкониятларнинг бошланишидир. Ҳар бирингизнинг қалбингизда ўз орзуингиз бор. Ана шу орзуга элтувчи энг ишончли йўл – билимдир. Шунинг учун мактабга дадил қадам билан боринглар. Яхши ўқинглар, устозларингизни тингланглар, дўстларингизни қадрланглар. Энг муҳими – ўзингизга ишонинглар. Ҳар бир бола сифатли таълим олиш, бахтли болаликни кечириш ва улкан орзуларга эришиш ҳуқуқига эга. Ушбу эзгу ишни қўллаб-қувватлаб, болалар қувончига сабаб бўлган барча фуқароларга самимий миннатдорчилигимни билдираман, – деди Қалийма Жантўреева.

“Мактабга дадил қадам билан” акцияси болаларнинг билим олишга бўлган қизиқишини оширишга хизмат қилиши таъкидланди. Ижтимоий адолатли жамият ҳар бир бола учун имкониятларни тенглаштиришдан бошланишига алоҳида урғу берилди. Тадбир иштирокчиларининг юзида қувонч, ота-оналарнинг чеҳрасида эса миннатдорлик акс этди. 

“Әділет” партияси таълим олишда тенг имкониятларни таъминлаш, болаларнинг ижтимоий ҳолатидан қатъиназар, сифатли таълим олиши учун шароит яратиш ва ижтимоий қўллаб-қувватлашни кучайтириш йўналишидаги ишларни келгусида ҳам тизимли равишда давом эттиради.