Оммавий ахборот воситалари ходимлари куни арафасида вилоят Ижтимоий тараққиёт бошқармаси ҳамда Жисмоний тарбия ва спорт бошқармаси томонидан анъанавий спартакиада уюштирилди. Тадбирнинг очилиш маросимида вилоят ҳокими ўринбосари Бейсенбай Тажибаев  сўзга чиқиб, иштирокчиларга омад тилади.

Мусобақада ҳамкасбларимиз  волейбол, стол тенниси, кичик футбол, ланка тепиш ҳамда арқон тортиш бўйича беллашиб,  куч синашди.

Спартакиада волейбол ва ланка тепишдан бошланди. Унда “Тұран БАҚ” жамоаси яққол ажралиб турди.  Миллий ўйин – ланка тепиш бўйича “Turkistan” телеканалининг ходими Айдўс Игиликов биринчи ўринни эгалласа, ушбу мусобақа учун махсус тайёрланган ҳамкасбимиз Собиржон Исаматов иккинчи ўринга сазовор бўлди. Учинчи ўринни эса “Баспасөз хатшылары” жамоасидан Тўребек Байтасов қўлга киритди.

Ҳамкасбларнинг чаққонлигини кўрсатадиган яна бир спорт тури – теннис бўйича эркаклар ўртасида биринчи ўринни “Тұран БАҚ” жамоасидан Даурен Тилеухан эгалласа, иккинчи ўринни ҳамкасбимиз Хуршид Қўчқоров қўлга киритиб, кумуш медаль соҳибига айланди. Учинчи ўринни “Turkistan” телеканалидан Султанбек Қудайберген қўлга киритди.

Хотин-қизлар ўртасида “Turkistan” телеканалининг ходими Рисгул Дўсжанова биринчи ўринни эгалласа, иккинчи ўринни “Баспасөз хатшылары” жамоасининг вакили Фариза Табилдиева қўлга киритди. Учинчи ўринга эса “Отырар” телеканалининг вакили Шинар Ўразова сазовор бўлди.

Футболдан “Turkistan” телеканалининг эркаклар жамоаси  ғолиб чиқди. Иккинчи ўринни “Тұран БАҚ”, учинчи ўринни “Баспасөз хатшылары” жамоаси қўлга киритди.

Арқон тортиш бўйича биринчи ўринни – “Оңтүстік” телеканали эгалласа, иккинчи ўрин – “Баспасөз хатшылары”, учинчи ўрин – “Turkistan” жамоасига насиб қилди. Мусобақа қизиқарли ва мароқли ўтди.

Тадбир сўнггида вилоят Ижтимоий тараққиёт бошқармаси раҳбари Ерлан Кузембаев ғолиб жамоалар ҳамда энг яхши – спортчи-журналистларни тақдирлади. Ҳар бир мусобақа ғолибига пул мукофотлари ҳамда энг яхши ўйин кўрсатган ОАВ вакилларига турли номинациялар топширилди.