“Минтақавий бандлик харитаси” доирасида жорий йилда вилоятда 118900 иш ўрни очиш режалаштирилган. Бу, ўз навбатида, аҳоли зич жойлашган ҳудудда ишсизлар сонини камайтириш имконини беради. Шунингдек, вилоятда қашшоқликни камайтириш ва аҳолини ижтимоий қўллаб-қувватлаш борасида ҳам салмоқли ишлар амалга оширилмоқда. Бу ҳақда вилоят бандликни мувофиқлаштириш ва ижтимоий дастурлар бошқармаси раҳбари Асия Темирбаева маълум қилди.

– Вилоятда камбағаллик даражасини пасайтиришни таъминлаш устувор вазифалардан бирига айланди. 2023 йилда вилоят туман ва шаҳарлари ҳокимликлари билан сармояларни жалб этиш, ишсиз аҳолини самарали иш билан таъминлаш, тадбиркорлик фаолиятини ривожлантириш, жумладан, “Қишлоқ омонати” лойиҳасини амалга ошириш, кам таъминланган аҳоли ва кам таъминланган оилалар даромадини ошириш ҳисобига фуқароларнинг даромадларини камида 15 фоизга кўпайтиришни таъминлаш юзасидан меморандумлар тузилди, – деди у журналистларга берган мусоҳабасида.

Шунингдек, бошқарма раҳбари вилоятда давлатимиз томонидан ажратилаётган маблағлардан ташқари “Ғамхўрлик” дастури ҳам амалга оширилаётганини таъкидлади. Унинг мақсади хайрия тадбирларига ҳомийларни жалб қилиш ва оғир ҳаётий вазиятга мубтало бўлган оилаларни ижтимоий қўллаб-қувватлашдан иборат.

Шунингдек, ахборот тизими мунтазам равишда такомиллаштирилмоқда. Бугунги кунда манзилли ижтимоий ёрдам сўраб мурожаат этувчиларнинг деярли барча даромадларини ахборот тизимида кўриш мумкин. 

2023 йил якуни бўйича ижтимоий ёрдам олувчилар сони 157,7 минг кишини (27 039 оила) ёки вилоят аҳолисининг 7,4 фоизини ташкил этди. 

Бу 2022 йилга нисбатан 20,5 фоизга кам (2022 йилда 198,4 минг киши).

Кам таъминланган фуқаролар сонини қисқартириш юзасидан ишлар давом эттирилиб, 2024 йил охирига қадар камбағаллик даражасини 5,5 фоизга, ижтимоий ёрдам олувчилар сонини эса 25 фоизга камайтириш режалаштирилган.

Иш билан таъминланган фуқароларнинг 96 фоизи (75,6 минг нафар) билан электрон меҳнат шартномалари тузилди, 89 фоизига (70,1 минг нафар) мажбурий пенсия бадаллари ўтказилди.

Вилоятда тадбиркорликни қўллаб-қувватлаш орқали иш ўринлари яратиш борасида бир қатор ишлар амалга оширилмоқда. 2024 йилда тадбиркорликни қўллаб-қувватлаш мақсадида 1755 нафар фуқарога янги бизнес ғоялари учун грант ажратилди. Улар орасида ўтган йилдан бошлаб вилоятдаги ҳар бир туман ва шаҳарнинг салоҳиятидан келиб чиққан ҳолда қалдирғоч лойиҳаларини амалга ошириш учун грант режасидан қайтарилмайдиган маблағлар ажратилмоқда.

Жорий йилда тадбиркорлик фаолиятини бошлаган 120 нафар грант соҳибларининг лойиҳалари учун маблағ ажратилди.

Бу борадаги ишлар натижасида вилоятда ишсизлик даражаси 4,8 фоиз (режа 4,9 фоиз), ёшлар ўртасида ишсизлик даражаси 1,9 фоизни (режа 3,8 фоиз) ташкил этмоқда.

Ишчи кучи кўп бўлган Жанубий ҳудуддан аҳолини Шимолга кўчириш ишлари амалга оширилмоқда. Ушбу йўналишда мунтазам ярмаркалар ўтказилмоқда. Меҳнат ва аҳолини ижтимоий ҳимоя қилиш вазирлиги томонидан 2024 йил учун республика бўйича 7050та квота ажратилиб, кўчиб борувчилар давлат томонидан қўллаб-қувватланадиган 7та минтақа белгиланди. Улар Абай, Қарағанди, Қўстанай, Павлодар, Шимолий Қозоғистон, Улитау, Шарқий Қозоғистон вилоятлари.

Ажратилган квота асосида жорий йилнинг саккиз ойида Туркистон вилоятидан 288 оила ёки 1116 нафар фуқаро кўчиб борди. Уларнинг 538 нафари меҳнатга лаёқатли, 304 нафари эса доимий иш ўрнига эга.

Мамлакат бўйича кўчиб борган 3494 кишининг 32 фоизи Туркистон вилоятидан.