Сафар доирасида Қасим-Жўмарт Тўқаев вилоятдаги таълим, маданият ва спорт иншоотларида, шу жумладан, "Дўстлик уйи"да бўлиб, фаоллар билан учрашди. Шунингдек, қатор корхоналарга бориб, минтақада амалга оширилаётган сармоявий лойиҳалар билан танишди.

ҚР Президентининг Туркистон вилоятига сафари Хожа Аҳмад Яссавий мақбарасини зиёрат қилишдан бошланди.

Давлат раҳбари ёзувчи, олим, туркий оламнинг маънавий устози Хожа Аҳмад Яссавий ҳамда мақбара ҳудудида дафн этилган бошқа тарихий шахслар руҳига Қуръон тиловат қилди.

Қасим-Жўмарт Тўқаевга ЮНЕСКОнинг Бутунжаҳон мероси рўйхатига киритилган мақбарада олиб борилаётган мажмуавий илмий-тадқиқот ишлари ҳақида баён қилинди.

Сўнг Давлат раҳбари “Таълим-Инновация” лицей-интернатига ҳам ташриф буюрди.

Қасим-Жўмарт Тўқаев ушбу таълим масканидаги билим бериш жараёнининг ўзгачалиги ва ўқувчиларнинг илмий-тадқиқот лойиҳалари билан танишди.

Лицейда табиатшунослик-математика йўналишига устуворлик қаратилган. Дарслар инглиз тилида олиб борилади.

Йил бошида янги бино фойдаланишга топширилиб, лицей-интернат Кентовдан Туркистон шаҳрига кўчирилди. Ҳозир бу ерда 500дан зиёд ўқувчи таълим олади.

Президент ўқув ва тўгарак кабинетлари, спорт залини оралаб, ўқувчилар билан мулоқотда бўлди.

Давлат раҳбари мамлакатимиз келажаги ёш авлод қўлида эканини таъкидлаб, уларнинг аъло баҳоларга ўқишига муваффақият тилади.