Қозоғистон Республикаси Бош вазирининг биринчи ўринбосари Нурлибек Налибаев Туркистон вилоятига амалий ташрифи доирасида “Сайрам-Ўгам давлат миллий табиат боғи”да экологик туризмни ривожлантириш масалаларига бағишланган сайёр йиғилиш ўтказди.

Тадбирда мамлакатимиз ва хориждан келган 50 нафардан зиёд салоҳиятли сармоядор иштирок этиб, ҳудудда амалга оширилиши режалаштирилган лойиҳалар муҳокама қилинди.

Йиғилишда Қасим-Жўмарт Тўқаевнинг топшириқлари ижроси доирасида экотуризмни ривожлантириш, табиий ҳудудларни асраб-авайлаган ҳолда сайёҳлик инфратузилмасини такомиллаштириш ҳамда сармоя жалб қилиш масалаларига алоҳида эътибор қаратилди.

Қозоғистон Экология ва табиий захиралар вазири Ерлан Нисанбаев миллий боғларнинг туристик салоҳиятидан самарали фойдаланиш, халқаро даражадаги экотуризм иншоотларини шакллантириш ва барқарор туризм тамойилларини жорий этиш бўйича амалга оширилаётган ишлар ҳақида ахборот берди.

Унинг таъкидлашича, мазкур ташаббуслар ҳудуднинг туристик жозибадорлигини ошириш, янги иш ўринлари яратиш, маҳаллий иқтисодиётни ривожлантириш ва табиий захиралардан оқилона фойдаланиш имконини беради. Шунингдек, сармоядорлар учун кўзда тутилган давлат қўллаб-қувватлаш чоралари ҳам тақдим этилди.

Йиғилишда миллий боғ ҳудудида амалга оширилиши режалаштирилган сармоявий лойиҳалардан бири – Биркўлик дарасида экологик, оилавий ва фаол туризмни ривожлантиришга қаратилган дам олиш маскани қуриш лойиҳаси тақдим этилди.

Шунингдек, Қасқасу дарасида туристик-соғломлаштириш мажмуасини барпо этиш ҳамда Сайрамсу дарасида туристик инфратузилмани шакллантириш бўйича ташаббуслар кўриб чиқилди.

Тўлебий ва Тулкибош туманларида халқаро андазаларга жавоб берадиган туристик мажмуалар қуриш режалари ҳам тақдим этилди. Лойиҳалар доирасида савдо тармоқлари, меҳмонхоналар, дам олиш масканлари, жамоат жойлари ва сервис иншоотларини барпо этиш назарда тутилган.

Йиғилишда халқаро аҳамиятга эга “KASKASU” тоғ-чанғи кластери концепцияси ҳам тақдим этилди. Лойиҳа Туркистон вилоятини Марказий Осиёдаги етакчи тоғ туризми марказларидан бирига айлантиришни мақсад қилган. Уни ”China Construction Sixth Engineering Bureau Corp., “LTD” компанияси билан ҳамкорликда амалга ошириш режалаштирилмоқда.

Мазкур лойиҳа доирасида халқаро талабларга жавоб берадиган тоғ курорти инфратузилмасини шакллантириш, туристик овуллар, меҳмонхоналар, оилавий дам олиш ҳудудлари, спорт ва кўнгилочар иншоотлар ҳамда замонавий осма йўлларни қуриш кўзда тутилган. Лойиҳанинг умумий қиймати қарийб 172 миллиард тенгега баҳоланмоқда

Йиғилиш якунларига кўра, Нурлибек Налибаев экотуризм табиатни муҳофаза қилиш ва иқтисодий ривожланишни уйғунлаштирувчи муҳим соҳалардан бири эканини таъкидлади. У сармоявий лойиҳаларни амалга оширишда қурилиш сифати, экологик талабларга риоя қилиш ва белгиланган муддатларга қатъий амал қилиш зарурлигини қайд этди.

Шунингдек, сармоядорлар зиммасидаги масъулият масаласига алоҳида тўхталиб, ҳар бир лойиҳа аниқ мажбуриятлар ва муддатлар асосида амалга оширилиши зарурлигини билдирди. Агар сармоядор шартнома талабларини бажармаса, ер майдони давлат тасарруфига қайтарилиши таъкидланди.

Амалий ташриф доирасида Нурлибек Налибаев Туркистон вилояти ҳокими Нуралхан Кўшеров билан бирга вертолётда Сайрам-Ўгам миллий боғи ҳудудини кўздан кечириб, унинг табиий ва туристик салоҳияти билан танишди. Шу билан бирга, табиий экотизимни сақлаш ва сайёҳлик инфратузилмасини ривожлантириш масалалари муҳокама қилинди.

Сайёр йиғилиш якунида масъул давлат идоралари ва сармоядорларга экотуризмни ривожлантиришга қаратилган лойиҳаларни жадал амалга ошириш, инвесторлар билан ҳамкорликни кучайтириш, миллий боғнинг халқаро туристик жозибадорлигини ошириш ҳамда барча лойиҳаларнинг белгиланган муддатларда сифатли бажарилишини таъминлаш бўйича тегишли топшириқлар берилди.