ҚР Маориф вазирлиги ҳузуридаги Миллий илмий-амалий жисмоний тарбия маркази томонидан Тараз шаҳрида 5-6-синф ўғил болалари ўртасида волейбол ва тўғизқумалақ бўйича Миллий мактаб лигасининг республика босқичи мусобақалари поёнига етди.

Қизғин ва муросасиз кечган баҳсларда вилоятимиз шарафини муносиб ҳимоя қилган Сайрам тумани таълим бўлимига қарашли Ҳамза номли 3-сонли умумтаълим мактаби ўқувчиларидан иборат жамоа волейбол бўйича республика чемпиони бўлиб, фахрли 1-ўринни қўлга киритди.

Шунингдек, Тулкибош туманидаги Шерхан Муртаза номли мактаб-гимназия жамоаси тўғизқумалақ мусобақасида муваффақиятли иштирок этиб, 3-ўринга сазовор бўлди. Бундан ташқари, Сайрам тумани таълим бўлимига қарашли “Далабозор” умумтаълим мактаби ўқувчилари жамоаси баскетбол бўйича барча рақибларини ортда қолдириб, 1-ўринни эгаллади.

Мусобақалар давомида ёш спортчилар юксак маҳорат, кучли ирода, жамоавий ҳамжиҳатлик ва матонат намоён этиб, вилоят шарафини республика миқёсида муносиб ҳимоя қилдилар. Уларнинг ғалабаси вилоятда мактаб спорти изчил ривожланаётгани ва иқтидорли ёшлар салоҳияти юксак эканлигининг ёрқин исботи бўлди.

 Ёш чемпионларимиз ва уларнинг мураббийларини зафар билан чин қалбдан табриклаймиз!