Сўзоқ туманида ҳам анъанавий Август анжумани ўтди. Унда туман ўқитувчилари, таълим соҳаси мутахассислари ҳамда махсус таклиф этилган меҳмонлар иштирок этди.

Кенгашда туман ҳокими Мухит Турисбеков устоз-мураббийлар жамоасини янги ўқув йили билан табриклаб, таълим ва тарбия сифатини оширишда ўқитувчи меҳнатининг аҳамиятини таъкидлади.

Йиғилишда Сўзоқ туманидаги таълим соҳасининг асосий кўрсаткичлари таҳлил қилиниб, янги ўқув йили учун режалар муҳокама қилинди. Таълим сифатини ошириш, ўқувчиларнинг ҳар томонлама ривожланиши учун шароит яратиш, муаллимлар касбий маҳоратини юксалтириш, замонавий технологияларни таълим жараёнига самарали татбиқ этиш ҳамда таълим олувчилар учун қулай муҳит шакллантириш масалаларига устувор аҳамият берилди.

Айни пайтда тумандаги 35та мактаб ва 39та мактабгача таълим ташкилотида 2613 нафар педагог меҳнат қилмоқда. Бу йил 1 360 нафар бола илк бор мактаб остонасига қадам қўйди.

Август кенгаши доирасида таълим соҳасига муносиб ҳисса қўшган қатор устоз-мураббийлар вазирлик, вилоят ва туман ҳокимликлари, шунингдек, таълим бошқармаси ҳамда туман таълим бўлими томонидан тақдирландилар. 

Билимли авлод – мамлакат келажагининг мустаҳкам пойдеворидир!