Оқсувкент қишлоғидаги Қ. Жандарбеков номли Маданият уйида «Янги халқ Конституциясининг меъёрлари ва қадриятлари: инсон капиталини ривожлантириш – таълим тизимининг дастурий асоси» мавзуида таълим соҳаси ходимларининг анъанавий август анжумани ўтди. Унда ўтган ўқув йили якунлари сарҳисоб қилиниб, янги ўқув йилига тайёргарлик масалалари муҳокама қилинди.

Тадбирда туман ҳокими Мадияр Ўразалиев, вилоят таълим бошқармасининг мактабгача ва ўрта таълим бўлими бошлиғи Ғалия Жанаева, туман прокурори Бахитжан Байғўзиев, «Әділет» партияси туман бўлими ижроия котиби Қуаниш Сиздиқов, туман фахрийлар кенгаши раиси Сихимбай Сағиндиқов, шунингдек, қишлоқ  ҳокимлари, туман полиция бошқармаси, «Жамоат тотувлиги» муассасаси туман бўлими, туман оталар кенгаши, ОАВ вакиллари, ота-оналар қўмиталари раислари, мактаб ва коллеж директорлари ҳамда фахрий устозлар иштирок этдилар.

Тадбир аввалида иштирокчилар экранда намойиш қилинган видеоролик орқали 2025-2026 ўқув йилида таълим соҳасида эришилган ютуқлар билан яқиндан танишдилар. Дарҳақиқат, эришилган натижалар залворли. Бугунги кунда тумандаги 99та таълим муассасасида 66761 нафар ўқувчи таълим-тарбия олмоқда, уларда 8784 нафар устоз меҳнат қилмоқда. Ўтган ўқув йили якунига кўра, таълим сифати 62,6 фоизни ташқил қилди ва бу кўрсаткич ўтган йилга нисбатан 9,3 фоизга ошди.

Анжуманда туман ҳокими 

М. Ўразалиев, туман прокурори Бахитжан Байғўзиев ва «Әділет» партияси туман бўлими ижроия котиби Қ. Сиздиқовлар устозларни янги ўқув йилининг бошланиши билан табриклаб, эзгу тилакларини изҳор этдилар. Таълим соҳасида юқори натижага эришган илғор педагоглар Сайрам туман ҳокими, вилоят таълим бошқармасининг Фахрий ёрлиқлари, шунингдек, туман прокуратурасининг ташаккурномалари билан тақдирландилар.

Жорий йилги ЯМТ натижаларига кўра, 2699 битирувчининг 1124 нафари давлат таълим грантига эга бўлди. 229 нафар битирувчи «Алтын белгі», 471 нафар битирувчи эса «Үздік аттестат» соҳиблари бўлишди. Ўқувчилар халқаро, республика ва вилоят олимпиадалари ҳамда илмий лойиҳаларда юқори натижаларни қўлга киритишди.

Тадбирда туман таълим бўлими раҳбари Бауиржан Ахметов «Таълим ва илм – муваффақиятга эришишнинг энг муҳим калити» мавзуида маъруза қилди. У, жумладан, таълим сифатини ошириш, ўқитувчиларнинг касбий ривожланиши, инфратузилма, хавфсизлик, рақамлаштириш ва сунъий идрокни таълим жараёнига татбиқ этиш йўналишларидаги вазифаларга тўхталди.

Шунингдек, анжуманда Академик А. Қуатбеков номидаги Халқлар Дўстлиги университетининг «Тарих, ҳуқуқ ва бизнес» кафедраси мудири, фалсафа фанлари номзоди, доцент Қинатбек Кемелбеков ва  М. Ауезов номидаги Жанубий Қозоғистон тадқиқот университетининг «Сиёсатшунослик» кафедраси мудири, тарих фанлари бўйича фалсафа (PhD) доктори, доцент Ардақ Мўнтаев  маъруза қилдилар.

Таълим сифатини ошириш, устоз-мураббийларнинг касбий салоҳиятини кучайтириш, хавфсиз ва қулай таълим муҳитини шакллантириш, рақамли технологиялар ва сунъий идрок имкониятларидан самарали фойдаланиш, шунингдек, «Адолатли фуқаро» қадриятлари асосида билимли ва масъулиятли авлодни тарбиялаш янги ўқув йилидаги устувор йўналишлар сифатида қайд этилди.