Туркистон вилояти ҳокими Нуралхан Кўшеров Жетисой туманига амалга оширган ишчи сафари давомида саноат парки ва индустриал ҳудудда жойлашган корхоналар фаолияти, шунингдек, амалга оширилаётган инвестиция лойиҳалари билан танишди.

Вилоят раҳбарига туман ҳокими Серик Мамитов ишлаб чиқариш корхоналарининг бугунги фаолияти, амалга оширилаётган лойиҳалар ва келгусидаги режалар ҳақида маълумот берди.

Туманда қурилиш материаллари, мато, темир буюмлар, пойабзал, тиббий пахта, термопанеллар ва полиэтилен маҳсулотлари ишлаб чиқариш, ширинмия илдизини қайта ишлаш ҳамда кимёвий ювиш воситалари тайёрлашга қаратилган лойиҳалар амалга оширилмоқда. Шунингдек, махсус ва спорт пойабзаллари, этиклар ишлаб чиқаришни ривожлантиришга алоҳида эътибор қаратилмоқда.

Ишчи сафар давомида Нуралхан Кўшеров Асиқата қўрғони ҳудудидаги индустриал майдонни кўздан кечириб, бир қатор йирик инвестиция лойиҳаларининг амалга оширилиш жараёни билан танишди.

Жумладан, «MIR AGRO KZ» масъулияти чекланган шериклигининг мева-сабзавот сақлаш омбори ва саноат иссиқхонаси барпо этиш лойиҳаси тақдим этилди. Туркиянинг «Görkem Tarim» компанияси томонидан амалга оширилаётган мазкур лойиҳанинг умумий инвестиция қиймати қарийб 30 миллион АҚШ долларини ташкил этади. Айни пайтда 8 минг тонна маҳсулот сақлашга мўлжалланган омбор қурилиши давом этмоқда. Уни йил охирига қадар фойдаланишга топшириш режалаштирилган. 2027 йилда эса 34 гектар майдонда саноат иссиқхонасини барпо этиш кўзда тутилган. Лойиҳалар доирасида 40 та доимий ва 200 та мавсумий иш ўрни яратилади.

Шундан сўнг вилоят ҳокими «Агро Сүт» масъулияти чекланган шериклигининг товар сут фермаси қурилиши билан танишди. Қиймати 13,1 миллиард тенгени ташкил этувчи лойиҳа 25 гектар майдонда амалга оширилмоқда. Корхона тўлиқ ишга туширилгач, бу ерда 2400 бош қорамол парваришланиб, йилига 20 минг тоннагача сут ишлаб чиқариш режалаштирилган. Натижада 200 нафар фуқаро доимий иш билан таъминланади. Корхона маҳсулотлари нафақат Қозоғистон бозорига, балки МДҲ мамлакатларига ҳам етказиб берилади.

Умуман олганда, «Жетисой» индустриал ҳудудида умумий қиймати 26,9 миллиард тенгени ташкил этувчи еттита инвестиция лойиҳаси амалга оширилмоқда. Уларнинг тўлиқ ишга туширилиши натижасида 1168 та доимий иш ўрни яратилади.

Мазкур лойиҳалар туманнинг ишлаб чиқариш салоҳиятини ошириш, қайта ишлаш саноатини ривожлантириш, янги иш ўринларини яратиш ва маҳаллий маҳсулотлар улушини кўпайтиришга хизмат қилади.

Вилоят ҳокими тадбиркорларнинг таклифларини тинглаб, инвестиция лойиҳаларини сифатли ва белгиланган муддатларда амалга ошириш муҳимлигини таъкидлади. Масъул соҳа раҳбарларига тадбиркорларни зарур қўллаб-қувватлаш, ишлаб чиқариш корхоналарининг қувватини ошириш ҳамда янги ташаббусларни амалга ошириш учун қулай шароит яратиш бўйича топшириқлар берди.