Туркистон вилоятининг Кентов шаҳридаги саноат ҳудудида янги завод фаолиятини бошлади. Ишлаб чиқариш корхонасининг очилиш маросимида вилоят ҳокими Нуралхан Кўшеров иштирок этиб, йиғилганларни қутлади.

– Республика куни мамлакатимиз суверенитетини намоён этадиган ва мустақиллигимизни мустаҳкамлайдиган муҳим байрамдир. Ушбу қутлуғ сана арафасида саноат учун металл конструкциялар ва металл буюмлар ишлаб чиқарувчи янги корхонанинг очилишига гувоҳ бўлиб турибмиз. Бу Туркистон вилоятининг саноат салоҳиятини ошириш ва ҳудуд иқтисодиётига янги суръат бағишлашга хизмат қиладиган муҳим лойиҳадир.

Давлат раҳбари Қасим-Жўмарт Тўқаев ҳудудларда маҳаллий ишлаб чиқаришни ривожлантириш, инвестиция лойиҳаларини амалга ошириш ва доимий иш ўринларини яратишга алоҳида эътибор қаратмоқда. Бу борадаги ишлар вилоятимизда тизимли равишда давом эттирилади, – деди вилоят ҳокими Нуралхан Кўшеров.

«АйдарСтройГрупп» масъулияти чекланган жамияти заводи лойиҳасига 1,5 миллиард тенге инвестиция жалб этилган. Корхонада 30та янги иш ўрни яратилди. Завод саноат тармоқлари учун металл конструкциялар ва металл буюмлар ишлаб чиқаришга ихтисослашган бўлиб, йилига 100 дона маҳсулот ишлаб чиқариш қувватига эга.

Лойиҳани амалга ошириш учун Кентов шаҳрининг саноат ҳудудидан «Туркистон» ижтимоий-тадбиркорлик корпорацияси орқали 1,5 гектар ер майдони ажратилган. Ҳозирги вақтда қурилиш-монтаж ишлари тўлиқ якунланиб, асосий технологик ускуналар ўрнатилган.

Корхонани зарур инфратузилма билан таъминлаш ишлари ҳам амалга оширилган. Ишлаб чиқариш объектига электр тармоғи тортилиб, трансформатор ўрнатилган. Шунингдек, табиий газга улаш учун зарур ишлар бажарилган.

Тантанали маросим давомида вилоят ҳокими корхона фаолияти билан танишиб, ишлаб чиқариш жараёнини кўздан кечирди. Янги заводнинг ишга туширилиши Кентов шаҳрининг саноат салоҳиятини мустаҳкамлаш, маҳаллий ишлаб чиқаришни ривожлантириш ва аҳолини доимий иш билан таъминлашга хизмат қилади.

Вилоят ҳокими иш сафари давомида Кентов шаҳридаги саноат ҳудудини ҳам айланиб чиқди. Масъулларга янги ишлаб чиқариш корхоналарини ташкил этиш ишларини жадаллаштириш бўйича топшириқлар берди.

Вилоятда янги ишлаб чиқариш корхоналарини очиш ва саноат салоҳиятини оширишга қаратилган ишлар давом эттирилади.