– Мен шу кунларда ишсизман, бирорта касб-ҳунар ўрганай десам, уй-рўзғордан орттира олмайман. Бола-чақамнинг ризқини қийиб, пулли ўқишларга ҳам кира олмайман. Бандлик марказида давлат рўйхатидан ўтган ишсиз фуқаролар учун ўқиш бепул экан, деб эшитдим. Шу ҳақда батафсил маълумот берсангиз.

С. ОРИПОВ.

Шимкент шаҳар ҳокимлигининг Аҳолини иш билан таъминлаш маркази қисқа муддатли касбий ўқитишни йўлга қўйган. Давлатнинг ушбу дастури 2017-2021 йилларга мўлжалланган Натижали бандликни ривожлантириш ҳамда тадбиркорликни оммалаштириш бўйича “Еңбек” давлат дастури доирасида амалга оширилади. Унинг биринчи йўналишига кўра ишсиз фуқаролар, ўзини ўзи иш билан таъминлаганлар ва натижасиз фаолият билан шуғулланаётганлар 3 ой давомида қисқа муддатли касбий ўқув жараёнида қатнашишлари мумкин. Улар 3 ой бепул ўқитилади ҳамда стипендия билан таъминланади.

Бу дастурда қатнашиш учун қаерга бориш лозим ва қайси ҳужжатлар топширилади?

Шимкент шаҳар, Байтереков кўчаси, 89-уйда жойлашган Бандлик марказига топширилади. Телефони: 8 (7252) 39-42-79.

Ариза берган чоғда қуйидаги ҳужжатларнинг асл нусхаси ва кўчирмаси бўлиши керак:

1. Шахсий гувоҳнома.

2. Меҳнат дафтарчаси (агар бор бўлса).

3. Касб-ҳунар олганлиги ёки таълимий маълумотини тасдиқловчи ҳужжат (аттестат, гувоҳнома, диплом, сертификат ва бошқалар).

4. 086-У шаклидаги тиббий маълумотнома. 

Агар ушбу ҳужжатлар топширилса, даъвогар қуйидаги касбларга ўқитилиб, замонавий мутахассис бўлиш имконига эга:

1. Ошпаз.

2. Қандолатчи.

3. Пардозчи (визажист).

4. Сартарош.

5. Маникюр устаси.

6. Электрчи.

7. Пайвандчи.

8. Автоэлектрчи.

9. Автокран устаси.

10. Сантехник ва бошқа мутахассисликлар.