ҚР Таълим ва фан вазирлигининг тавсиясига мувофиқ, жорий йил мамлакатимизда биринчи қўнғироқ тадбирлари мактабларда 1-синф ўқувчилари иштирокида ўтди.
Шимкент шаҳри таълим бошқармаси маълумотига кўра, жорий йили учинчи мегаполисда 203 таълим маскани иш бошлаб, таълим масканларининг 1-синфига келган ўқувчилар сони жами 25 мингни ташкил этди. Шу куни шаҳарда қурилиши тугалланган 20та янги мактаб ўқувчиларга қучоқ очди.
Қарийб юз йил аввал қурилган авария ҳолатидаги 79-сонли мактаб ўрнида қад ростлаган “Низамхан” хусусий ўрта мактабининг очилишига ташриф буюрган Шимкент шаҳар маслаҳатининг котиби Бахадир Наримбетов устоз ва ўқувчиларни янги ўқув йилининг бошланиши билан қутлаб, мактаб муассиси Низомхон Сулаймоновга миннатдорчилик билдирди.
Шуни алоҳида таъкидлаш жоиз, тадбиркор шу кунгача Шимкент шаҳрининг Сайрам даҳасида 900 ўринли “Арофат”, “Мирас” мавзесида 1200 ўринли Абай Қунанбаев номли, шунингдек, Сайрам туманининг Қорабулоқ қишлоғида 2400 ўринли Низомхон Сулаймонов номли мактабларни қуриб, элнинг эътибори ва ҳурматини қозонди.
Ушбу даргоҳда ўқувчиларнинг пухта билим олиши ва ҳар томонлама ривожланиши учун барча шароитлар яратилган. Мактабда улуғ қозоқ шоири ва мутаффаккири Абай номидаги қозоқ тили ва адабиёти, шунингдек, информатика ҳамда робототехника кабинетлари, тиббиёт бўлими, иккита ёпиқ спорт, гимнастика ва мажлис заллари, муҳташам ошхона ҳамда кутубхона мавжуд.
Мактабда қозоқ, рус ва ўзбек тилларида давлат андазалари асосида таълим берилади. 1-6-синф ўқувчилари учун куни узайтирилган гуруҳлар мавжуд, мактабга қатнаш учун техника ёлланган. 5-10-синфларнинг аълочи ўқувчилари, фан олимпиадалари, танлов ва спорт мусобақалари ғолибларига ой сайин мактаб муассисининг стипендияси берилади. Йил якунида илғор ўқувчилар Нур-Султан, Алмати, Туркистон, Тошкент, Самарқанд, Бухоро каби шаҳарларга бепул саёҳатга чиқадилар.
Ҳозирги кунда шаҳарда фаолият юритаётган уч мавсумли мактабларни бартараф этиш мақсадида келгуси уч йилда 72 мактаб қурилиши режаланган.