Туркистон вилоятида техник ва касб-ҳунар, ўрта таълимдан кейинги таълим муассасалари ўқувчилари ўртасида «WORLDSKILLS TURKISTAN-2023» касбий маҳорат вилоят чемпионати бошланди. WorldSkills – ишчи касбининг мавқеини ошириш ва улуғлаш, касб-ҳунар таълимининг техник, хизмат кўрсатиш ва қурилиш соҳаларида иштирокчиларнинг тайёргарлиги, касбий малакаси, ижодкорлиги ва олий меҳнат маданиятини, замонавий ахборот-коммуникация технологияларини  амалда фойдаланиш қобилиятини синовдан ўтказиш йўналишидаги ҳаракатдир. 

Бу дунёнинг 82та давлатида кенг тарқалган ва доимий трендга айланган ноёб лойиҳалардан биридир. Туркистон вилояти Қозоғистон бўйлаб ўтказиладиган миллий чемпионатда 2015 йилдан иштирок этиб келмоқда.

Бу йилги вилоят биринчилиги 24-28 апрель кунлари Туркистонда ўтади. 

“Конгресс холл” мажмуасида Туркистон вилояти ҳокими ўринбосари Бейсен Тажибаев инновацион лойиҳалар кўргазмасига ташриф буюриб, тантанали йиғилишда чемпионатни расман очиқ деб эълон қилди. Танловни ташкил этишнинг аҳамиятига тўхталиб, ёшларнинг меҳнатига ижобий баҳо берди.

– «WORLDSKILLS TURKISTAN-2023» танлови махсус таълим муассасаларида инновацион лойиҳаларни кўпайтириш ва такомиллаштиришга бевосита хизмат қилмоқда. Ўтган йили Туркистон вилояти ёшлари республика мусобақасида 9-ўринни эгаллади. Бу йил янада юксак марраларни забт этиш имконияти мавжуд. Зеро, танлов ўқувчиларни янги лойиҳаларга жалб қилиш, истиқболли ғояларни амалга ошириш имконини беради. Янги бизнес-лойиҳа ва ғояларга, талабга эга бўлган касбларга мослашиш муҳим. Вилоятимиз аграр минтақа экан, ишлаб чиқариш, қишлоқ хўжалиги, инновацион лойиҳаларга устувор аҳамият қаратилиб, уларнинг истиқболларини белгилаб, такомиллаштиришимиз керак. Махсус таълим муассасалари зиммасига улкан масъулият юкланган. Жорий йилда Давлат раҳбари Қасим-Жўмарт Тўқаев кўмагида ёшларга 2,5 фоизли имтиёзли кредит ажратилади, шу жумладан. Туркистон вилоятига 2,9 млрд. тенге. Бундай давлат дастурларига ёшларни янада кенгроқ жалб этиш режалаштирилган. Туркистон вилоятида 52та коллеж мавжуд, уларда 35 мингдан зиёд талаба таълим олади. Вазирлик ва вилоят ҳокимлиги таълим соҳасини имкон қадар қўллаб-қувватламоқда. 2022-2023 ўқув йили учун 15300та грант ажратилган. “Ёш мутахассис” дастури доирасида вилоятдаги 9та коллеж зарур жиҳозлар билан таъминланди. Бу борадаги ишлар муттасил давом эттирилади. Мусобақада иштирок этаётган ёш спортчиларга омад тилаб қоламиз, – деди Бейсен Даулетули.

Тадбирда 47та коллеждан 214 нафар ўқувчи чемпионлик учун кураш олиб бормоқда. Бу йил илк бор алоҳида таълимга муҳтож болалар иштирокида «ABILYMPICS TURKІSTAN – 2023» мусобақаси ўтказилади.

Эслатиб ўтамиз, вилоят биринчилигида ўқувчилар техника, қурилиш, қишлоқ хўжалиги, ІТ соҳаси, техник хизмат кўрсатиш, транспорт, таълим, озиқ-овқат маҳсулотларини ташкил этиш йўналишлари бўйича ўзаро куч синашмоқда. Хусусан, электромонтаж, сантехника ва иситиш, автомобиль таъмирлаш, электроника, мобил аксессуарлар ишлаб чиқиш, график дизайн, веб-технологиялар, мобил робототехника, безак технологияси, ресторан хизмати каби махсус лойиҳалар мавжуд.

Ғолиблар І, ІІ ва ІІІ даражали дипломлар ҳамда молиявий мукофот билан тақдирланадилар. Чемпионатнинг І даражали дипломи ғолиблари «WORLDSKILLS KAZAKHSTAN – 2023» республика миллий чемпионатига йўлланма олади.