Бу ҳақда вилоят минтақавий алоқалар хизматида Сайрам тумани ҳокими Арман Сабитов маълум қилди.

– Сайрам тумани вилоятдаги иқтисодий салоҳияти юксак, ўзига хос тараққиёт йўлига эга йирик ҳудуд, – деди учрашув аввалида А. Сабитов. – Туманда 235 мингдан зиёд фуқаро истиқомат қилади ва бу кўрсаткич вилоят аҳолисининг 11 фоизини ташкил этади. Жумладан, 11та қишлоқ округи, 42та аҳоли манзили мавжуд.

2023 йилги туман бюджетининг миқдори 20,3 миллиард, даромадлар режаси 10 миллиард тенге. Даромаднинг ортиши туманнинг янада равнақ топиши, долзарб муаммоларни ҳал этишга хизмат қилмоқда.

Туманнинг ижтимоий-иқтисодий тараққиёти барқарор, жорий йилнинг 9 ойида иқтисодий кўрсаткичларнинг ўсиши таъминланди. 

Ўтган 9 ойда туманга 38,9 млрд. тенге сармоя жалб этилди. Бу кўрсаткич ўтган йилга нисбатан 18,3 фоизга ошган.

А. Сабитов, шунингдек, туманда ҳудудий маҳсулот ҳажми сезиларли даражада ошганини таъкидлади. Жумладан, 2023 йилнинг 9 ойида бу кўрсаткич 185 млрд. тенгега етди, ўсиш 103,3 фоизни ташкил этди.

– Йил бошидан буён саноат соҳасида 33,9 миллиард тенгелик маҳсулот ишлаб чиқарилди. Саноат маҳсулоти ишлаб чиқариш ҳажми 3 йилда 1,7 баравар ортиб, бугунги кунда туман вилоятда учинчи ўринни эгаллади. Шунингдек, 2023-2024 йилларда туманда жами 75 млрд. тенгега 19та сармоявий лойиҳани амалга ошириш ва 886та янги иш ўрни яратиш режалаланган. Шу жумладан, йил бошидан 9та лойиҳа ишга туширилиб, 279та иш ўрни яратилди, – деди туман раҳбари.

Яқин келажакда амалга ошириладиган лойиҳалар қаторида сут маҳсулотлари ишлаб чиқарувчи “Туран Агро ет-сүт” ишлаб чиқариш ширкати ҳам бор. Шунингдек, “Meat magnat” МЧБ 2 минг қорамолга мўлжалланган бўрдоқилаш майдонини қурмоқда. Бундан ташқари, қишлоқ хўжалиги маҳсулотлари ишлаб чиқарувчи “Samid  Master” МЧБ заводининг қурилиши давом этмоқда.

Шунингдек, “Ет Агро Манкент” ва “Тұран агро Ет-сүт” ИЧШлар “ZHONG BANG HAO TONG” компанияси билан қорамол бўрдоқилаш мажмуаси, кушхона, гўштни ва қонни қайта ишлаш корхоналари қуриш, шунингдек, ускуналар харид қилиш борасида ҳамкорлик меморандумини имзолаган. Натижада, сайрамлик тадбиркор Хитой компанияси билан ҳамкорликда 2024 йилнинг март ойидан бошлаб қорамол териси, қон ва суякларини чиқиндисиз қайта ишлайдиган завод қурилишини бошлайди.

Сайрам тумани қишлоқ хўжалиги ривожланган ҳудудлардан. Йил бошидан буён ушбу соҳада 103,2 млрд. тенгелик маҳсулот ишлаб чиқарилиб, вилоятда етакчилик қилмоқда.

Шунингдек, жорий йилнинг 9 ойида вилоятда иссиқхона маҳсулотлари етиштириш режадан ошириб, бажарилиб, тумандаги иссиқхоналар майдони 75,7 гектарга етди. Чорвачиликда ҳам ижобий натижаларга эришилди.

Қишлоқ хўжалиги маҳсулотларининг 57 фоизи чорвачилик улушга тегишли. Сайрам тумани мамлакатимиздаги энг йирик кушхоналар жойлашган ҳудудлардан бири. Шу боис, мазкур соҳада йирик лойиҳалар амалга оширилмоқда. 

Инфратузилма соҳасида ҳам ижобий ўзгаришлар кузатилмоқда. Тумандаги 42та аҳоли манзили электр энергияси билан тўлиқ таъминланган. Бугунги кунда табиий газ билан таъминлаш даражаси 81 фоизни ташкил этган бўлса, йил охирига қадар уни 88 фоизга етказиш режаланган. Шунингдек, туманда яхши ва қониқарли автомобиль йўлларининг улуши ўтган йили 62,4 фоизни ташкил этган бўлса, жорий йили бу кўрсаткич 70 фоизга етди.

Учрашув якунида туман раҳбари А. Сабитов журналистларнинг саволларига атрофлича жавоб берди.