Тулкибош тумани, Чақмоқ бобо қишлоғи ҳудудида жойлашган халқаро аҳамиятга молик автомобиль туннели ер ости йўлини фойдаланишга топшириш маросимида ҚР Транспорт вазири ўринбосари Сатжан Аблалиев, вилоят ҳокимининг биринчи ўринбосари Зулпихар Жўлдасов, Жамбил вилояти ҳокими ўринбосари Қанатбек Мадибек, соҳа мутахассислари ва икки вилоят оқсоқоллари иштирок этди.

Муҳим иншоотнинг очилиш тадбирида транспорт вазири ўринбосари аҳолини шодиёна билан қутлаб, соҳада амалга оширилаётган ишларга тўхталди.

– Ушбу ер ости йўлининг очилиши Қозоғистон транспорт инфратузилмаси учун муҳим воқеадир. Бу нафақат вилоятнинг йил давомида транспортдан фойдаланиш имкониятини яхшилайди, балки ҳудудда ҳаракат хавфсизлигини сезиларли даражада оширади. Туннель туфайли ҳайдовчилар қишда довонда қор остида қолиб кетмайди, – деди С. Аблалиев.

Йиғилганларни вилоят ҳокимининг биринчи ўринбосари Зулпихар Жўлдасов ҳам табриклади.

 Туннелнинг узунлиги 840 метрни ташкил қилади. Кенглиги – 11 метр, баландлиги – 8 метр.

Хавфсизликни таъминлаш учун ҳар икки томонида ёритиш, шамоллатиш ва бошқарув хоналари мавжуд. Бундан ташқари, туннелда видеокузатув ва ёнғиндан ҳимоя қилиш тизимлари ўрнатилган бўлиб, бу вазиятни кузатиш имконини беради.

Тадбир давомида транспорт вазири ўринбосари С. Аблалиев соҳа ривожига салмоқли ҳисса қўшган ва фаол меҳнат қилаётган бир гуруҳ фуқароларга кўкрак нишонини топширди ва ташаккурномалар билан тақдирлади.