Вилоят маслаҳати депутатлари туман ва шаҳарларда ҳисобот учрашувларини ўтказишмоқда.

Мақсад – фуқаролар томонидан кўтарилган муаммолар билан танишиб, уларни имкон қадар ижобий ҳал қилиш ҳамда амалга оширилган ишлар юзасидан ахборот бериш эди.

Махсус жадвалга кўра, учрашувлар Туркистон, Арис шаҳарлари ва Чордара, Мақтаарал, Жетисай туманларида ўтди.

Унда вилоят маслаҳати раиси Н. Абишов ҳамда юқорида қайд этилган туман, шаҳарлардан сайланган вилоят маслаҳати депутатлари Б. Шўйбеков, С. Аристанов, Е. Хандиллаев, Ж. Қанаев, Ж. Қурақбаев, Е. Ералиев, Т. Қаржауов, Б. Серманизов, Е. Қўсмамбетов, шунингдек, ҳокимлар, депутатлар, мутасадди соҳа раҳбарлари, жамоат ташкилоти раҳбарлари ва ОАВ вакиллари иштирок этди.

Халқ ноиблари фуқароларнинг мурожаат ва таклифларини тинглаб, уларнниг саволларига жавоб беришди. Хусусан, Чордара туманида УВУ фахрийси номини кўчага бериш, йўл таъмирлаш учун маблағ ажратиш, қишлоқ шифохоналарининг моддий-техника базасини янгилаш, маданият уйини таъмирлаш, шунингдек, кўчаларга қўшимча видеоназорат ускуналарини ўрнатишни таклиф қилишди.

Жетисайликлар сифатли сув таъминоти, “Бадастир мактаб” лойиҳаси доирасида мактаблар, замонавий шифохона қурилиши каби ижтимоий масалаларни кўтаришди.

Туркистон шаҳри аҳолиси уй-жой таъминоти, шунингдек, янгидан барпо этилган кичик туманларни газ, электр билан таъминлаш масалалари билан мурожаат қилишди. Арисликлар эса темирйўл устидан осма кўприк қуриш, яйловлар майдонини кенгайтириш масалаларини илгари сурди.

Учрашув сўнггида фуқаролар томонидан кўтарилган ижтимоий масалалар бўйича баённома тўлдириб, мутасадди давлат идораларига йўлланди. Ушбу масалалар ўз ечимини топгунга қадар, депутатлар назоратида бўлади.