Қозоғистонликларни қандай янгиликлар кутмоқда?

Президент рақамлаштириш, йўл ҳаракати хавфсизлиги, киберхавфсизлик ва шахсий маълумотларни ҳимоя қилишга оид қонунга имзо чекди. Янги ҳужжат фуқаролар ҳаётига дахлдор бир қатор муҳим ўзгаришларни назарда тутади.

Энг асосий янгиликлардан бири – учувчисиз транспорт воситалари ва дронлардан фойдаланиш соҳаси қонун билан тартибга солинади. Энди уларнинг ҳуқуқий мақоми аниқ белгиланиб, фойдаланиш қоидалари ишлаб чиқилади.

Транспорт воситасини бошқаришга тиббий қарши кўрсатмаси бўлган  шахслар ҳақидаги маълумотлар махсус рақамли базаларга киритилади. Бунда инсоннинг касаллиги ёки ташхиси ошкор этилмайди.

Шунингдек, тез ёрдам автомашиналари ва автобусларга видеокамералар ўрнатилиб, улар йўл ҳаракати қоидалари бузилиш ҳолатларини  қайд этади.

Яна бир муҳим янгилик – ҳайдовчиларни тайёрлайдиган автомактаблар фаолияти устидан назорат кучайтирилади. Улар махсус реестрга киритилиб, ўқув жараёни ахборот тизимлари орқали кузатиб борилади.

Қонун киберхавфсизлик масалаларига ҳам алоҳида эътибор қаратади. Давлат ва стратегик аҳамиятга эга иншоотларда ахборот хавфсизлиги талабларига риоя этилиши қатъий назорат қилинади.

Шахсий маълумотларни муҳофаза қилиш бўйича янги дастаклар жорий этилади. Маълумотларни йиғиш ва қайта ишлаш билан шуғулланувчи ташкилотлар махсус рўйхатга олинади. Шунингдек, маълумотлар хавфсизлиги бузилган ҳолатлар қайд этиладиган алоҳида реестр ташкил этилади.

Жамоат тартибини таъминлаш мақсадида Миллий видео мониторинг тизими йўлга қўйилади. Бу ҳуқуқбузарликларнинг олдини олиш ва хавфсизликни кучайтиришга хизмат қилади.

Бундан ташқари, давлат рақамли хайрия  платформаси ҳамда хайрия ташкилотлари реестри яратилади. Шу билан бирга, давлат чегараларининг рақамли тизимларини ҳимоя қилиш ва миграция хавфсизлигини кучайтириш бўйича қўшимча чоралар кўрилади.