ҚР Президенти Қасим-Жўмарт Тўқаев Бош вазир Асқар Мамин ва Соғликни сақлаш вазири Алексей Цойни қабул қилди

Давлат раҳбарига мамлакатдаги санитария-эпидемиологик вазият, аҳолини эмлаш жараёни, шунингдек, ижтимоий-иқтисодий тараққиётнинг долзарб масалалари юзасидан маълумот берилди.
Қасим-Жўмарт Тўқаевга аҳолини эмлаш юзасидан кўрилаётган чоралар ҳақида ахборот берилди.

Асқар Маминнинг таъкидлашича, апрель ойидан эътиборан ойига 2 миллионгача одамни эмлаш имкониятини яратиш режаланган.
Президентга маҳаллий QazVac вакцинасини минтақаларга етказиб бериш борасида ҳисобот тақдим этилди.
– Қозоғистон COVID-19га қарши вакцина ишлаб чиқарадиган ўнта давлат ва ўз ишланмаларини рўйхатдан ўтказган бешта мамлакат қаторига кирди, – деди у. – 26 апрелдан эътиборан барча соҳаларда «ASHYQ» дастуридан кенг фойдаланилади. Бу минтақанинг «қизил» ва «сариқ» ҳудудларга кирган пайтида иқтисодиётнинг турли тармоқларига хавфсиз шароитда ишлаш имконини беради.
Давлат раҳбарига тақдим этилган маълумотларга кўра, ҳозирги пайтда юқумли касалликлар шифохонасининг ўринлари 42 фоизга, интенсив терапия бўлимлари эса 28 фоиз тўлган. Дори ва ҳимоя воситаларининг зарурий захираси яратилди, ПЗР лабораторияларининг қуввати кунига 123 минг тестгача оширилди. Барча минтақаларда 25 мингдан зиёд ўрин, замонавий ускуналар билан жиҳозланган янги юқумли касалликлар шифохоналари мавжуд.
Асқар Мамин, шунингдек, Қасим-Жўмарт Тўқаевга 29-30 апрель кунлари ўтадиган Евроосиё ҳукуматлараро кенгашининг мажлисига тайёргарлик ҳақида маълумот берди. Бундан ташқари, учрашув давомида сармояларни жалб қилиш, аҳоли бандлигини қўллаб-қувватлаш билан боғлиқ масалалар кўтарилди.
Учрашув якунида, Президент Ҳукуматга маҳаллий вакцина ишлаб чиқаришни кўпайтириш ва у билан фуқароларни таъминлаш доирасидаги тадбирларни алоҳида назоратга олишни топширди.